ޗައިނާގައި ވައިރަސް ޖެހޭ މީހުންގެ އަދަދުތައް ދަށަށް، އިއްޔެ ވައިރަސް ޖެހުނީ 6 މީހުންނަށް
ބުދަ ދުވަހު އެގައުމުން ވައިރަސް ޖެހިގެން ރިޕޯޓްކޮށްފައިވަނީ 10 މީހުންނަށް
ޗައިނާގައި މަގުމައްޗަށް ނިކުތުމުގެ ކުރިން މީހުން އަންނަނީ މާސްކު އަޅަމުން
ކޮވިޑް-19 އެންމެ ފުރަތަމަ ފެނުނު ޗައިނާ އިން ބުރާސްފަތި ދުވަހު ވައިރަސް ޖެހިގެން ރިޕޯޓްކޮށްފައިވަނީ 6 މީހުންނަށެވެ.
ބުދަ ދުވަހު އެގައުމުން ވައިރަސް ޖެހިގެން ރިޕޯޓްކޮށްފައިވަނީ 10 މީހުންނަށެވެ. ޗައިނާގައި މި ދެތިން ދުވަހު ވައިރަސް ޖެހޭ މީހުންގެ އަދަދުތައް ވަނީ ވަރަށް ބޮޑަށް ދަށަށްގޮސްފަ އެވެ. ޗައިނާގެ ނޭޝަނަލް ހެލްތު ކޮމިޝަނުން ބުނެފައިވަނީ 6 މީހުންގެ ތެރެއިން 2 މީހުންނަކީ އެގައުމަށް އެތެރެވި މީހުންނެވެ. އޭގެކުރިން ދުވަހުން އެގައުމަށް އެތެރެވި މީހުންގެ ތެރެއިން 6 މީހުންނަށް ވަނީ ވައިރަސް ޖެހިފަ އެވެ.
ވައިރަސް ހަށިގަނޑުގައި ހުރި ކަމުގެ އަލާމާތެއް ނުފެނި ބުރާސްފަތި ދުވަހު 34 މީހަކު ވަނީ ވައިރަސް އަށް ޕޮޒިޓިވްވެފަ އެވެ. އޭގެކުރީ ދުވަހު އެގޮތަށް ވައިރަސް އަށް ޕޮޒިޓިވްވި 27 މީހަކު ވަނީ ފެނިފަ އެވެ. ޗައިނާގައި ވައިރަސް ހަށިގަނޑުގައި ހުރި ކަމުގެ އަލާމާތެއް ނުފެނި ޕޮޒިޓިވްވާ މީހުންގެ އަދަދުތައް އަންނަނީ މަތިވަމުންނެވެ.
މިހާތަނަށް އާއިރު އެގައުމުގެ 82،804 މީހަކަށް ވަނީ ވައިރަސް ޖެހިފަ އެވެ. އަދި 4632 މީހުން ވަނީ ވައިރަސް ޖެހިގެން މަރުވެފަ އެވެ.
