ރޯދަމަސް ބައްދަލުކުރިކަމީ، ބަލިމަޑުކަމުން އަރައިގަތުމަށް މެދުވެރިކޮށްދެއްވި ނަސީބެއް: ރައީސް
23 އެޕްރީލު 2020 | ބުރާސްފަތި 14:36މިއިން ޒަމާނެއްގައިވެސް އިންސާނުން ތަޖުރިބާކޮށްފައިނުވާ ފަދަ ވަރުގަދަ އިމްތިހާނަކާ ކުރިމަތިލާން ޖެހިފައިވާ ދުވަސްވަރެއް
ރައީސް އިބްރާހިމް މުހައްމަދު ސޯލިހު
ރަމަޟާން މަސް އަޅުގަނޑުމެންނާ ބައްދަލުކުރިކަމީ، މި ނުރައްކާތެރި ބަލިމަޑުކަމުން އަރައިގަތުމަށްاللهُ سُبْحَانَهُ وَتَعَالَىމެދުވެރިކޮށް ދެއްވި ވަރަށް މަތިވެރި ނަސީބެއް ކަމުގައި ދެކެވަޑައިގަންނަވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރަމަޟާން މަސް ފެށުމުގެ މުނާސަބަތުގައި ގައުމާ މުހާތަބް ކުރައްވާ ވާހަކަދައްކަވަމުން ރައީސް ވިދާޅުވީ، ރޯދަމަސް ބައްދަލުކުރީ، މިއިން ޒަމާނެއްގައިވެސް އިންސާނުން ތަޖުރިބާކޮށްފައިނުވާފަދަ ވަރުގަދަ އިމްތިހާނަކާ ކުރިމަތިލާންޖެހިފައިވާ ދުވަސްވަރެއްގައި ކަމަށެވެ.
"ކޮވިޑް19"ގެ ބަލިމަޑުކަން، ދިރިއުޅުމުގެ އާންމު ހަރަކާތްތައް ހުއްޓުމަކަށް ގެނެސްފި ކަމަށާއި، އިޖުތިމާއީ ގައިދުރުކުރުމަށް އިސްކަން ދޭންޖެހުމުގެ ސަބަބުން، ޖަމާއަތުގައި އަދާކުރާ އަޅުކަންތައްވެސް މެދުކަނޑައިލަން ޖެހިފައިވާކަން ރައީސް ސޯލިހު ފާހަގަ ކުރެއްވިއެވެ. ނަމަވެސް، މި ހިތާމައިގެ ދަނޑިވަޅުގައި ރަމަޟާން މަސް ބައްދަލުކުރި ކަމީ ބަލި މަޑު ކަމުން އަރައިގަންނަން މެދުވެރިވި ނަސީބެއް ކަމަށް ރައީސް ވިދާޅުވިއެވެ.
ރޯދަ މަހަކީ އަޅުކަމުގެ މޫސުމަށްވާއިރު ގުރުއާން ކިޔެވުމާއި ދުއާ ކުރުން ގިނަކޮށް، އަނެކުންނަށް ދީލަތިވުމާއި އެހީ ފޯރުވުމުގެ މައްސަރުކަން ފާހަގަކުރައްވަމުން އެމަނިކުފާނު ވަނީ މި މުހިންމު ދުވަސްތައް ހޭދަކުރަންވީ، "ކޮވިޑް-19" ގެ ނުރައްކާތެރިކަން ތެރެއިން ފިއްލަވައި، އަޅުގަނޑުމެންގެ އާންމު ދިރިއުޅުމުގެ ހާލަތަށް އެނބުރި ދިޔުމުގެ ހެޔޮ ތައުފީގު ދެއްވުން އެދި ކަމަށެވެ.
މިސްކިތްތައް ބަންދުކުރަން ޖެހުނަސް، ގޭގައި ތިބެގެންވެސް ފަރުޟު ނަމާދުތައް ބަރާބަރަށް ކުރެއްވުމަށް ހުރިހާ ފަރާތްތަކުންވެސް އިސްކަން ދިނުމަށް އިލްތިމާސް ކުރައްވާފައެވެ.
