އދ ގެ މައި ކައުންސިލެއްގެ ދެކޮމިޓީއެއްގެ މެންބަރުކަން ސައުދީއަށް ލިބިއްޖެ

ޔުނައިޓެޑް ނޭޝަންސް ނުވަތަ އދ ގެ މައި ކައުންސިލެއްގެ ދެކޮމިޓީއެއްގެ މެންބަރުކަން ސައުދީޢަރަބިއްޔާއިން ކާމިޔާބުކޮށްފިއެވެ.

އަންގާރަދުވަހު ސައުދީން ކާމިޔާބުކުރީ އދގެ ކޮމިޝަން އޮން ސައެންސް އެންޑް ޓެކްނޯލޮޖީ ފޮރ ޑެވެލޮޕްމެންޓް (ސީއެސްޓީޑީ) މެންބަރުކަމާއި، ކޮމިޝަން އޮން ކްރައިމް ޕްރިވެންޝަން އެންޑް ކްރިމިނަލް ޖަސްޓިސް (ސީސީޕީސީ) ގެ މެންބަރުކަމެވެ. މީގެތެރެއިން ސީއެސްޓީޑީގެ ގޮނޑި ކާމިޔާބުކޮށްފައިވަނީ 2020-2024 އަށް އަދި ސީސީޕީސީގެ ގޮނޑި 2021-2023ގެ ނިޔަލަށެވެ. ސީއެސްޓީޑީއާއި ސީސީޕީސީ އަކީ އދ ގެ އިކޮނޮމިކް އެންޑް ސޯޝަލް ކައުންސިލްގެ ސަބްސިޑިއަރީ ގުނަވަންތަކެވެ.

ސައުދީ ޢަރަބިއްޔާއަށް މި 2 ކޮމިޓީގެ މެންބަރުކަން ކާމިޔާބުވުމާއި ގުޅިގެން، އދ އަށް ކަނޑައަޅުއްވާފައި ހުންނަވާ ދާއިމީ މަންދޫބު ޢަބްދުﷲ ބިން ޔަޙުޔާ އަލް-މުޢައްލަމީ ވަނީ އދ.ގެތެރެއިން ސައުދީން ހޯދާފައިވާ ކާމިޔާބީ ފާހަގަކުރައްވާ އުފާފާޅުކުރައްވާފައެވެ. މަންދޫބު ވިދާޅުވީ، އދ ތެރެއިން މިހާބޮޑު ކާމިޔާބީއެއް ސައުދީއަށް ލިބިގެން ދިޔައީ އެޤައުމުން އެކި ދާއިރާތަކުން ހޯދަމުންދާ ކުރިއެރުމާއި ކާމިޔާބީގެ ސަބަބުން ކަމަށެވެ. އދ އިން މިލިބުނު ކާމިޔާބީއާއެކު އދ އާއި އދ ގެ ގުނަވަންތަކާއެކު ގުޅިގެން މަސައްކަތްކުރުމުގެ ފުރުޞަތު ފަހިވެގެންދާނެކަމަށެވެ.

ދެކޮމިޓީގެ މެންބަރުކަން ސައުދީއަށް ކާމިޔާބުވުމުން ދައްކުވައިދެނީ، ބައިނަލްއަޤުވާމި މައިދާނުގައި ސައުދީއަށް އޮންނަ އިތުބާރާއި، އެކި ދާއިރާތަކުން ހޯދާފައިވާ ކާމިޔާބީތަކުގެ ނަތީޖާއެވެ. އަދި މިއީ ރަސްގެފާނު ސަލްމާން ބިން ޢަބްދުލް ޢަޒީޒާއި، ބޮޑުވަޒީރުގެ ނައިބު އަދި ޑިފެންސް މިނިސްޓަރު މުޙައްމަދު ބިން ސަލްމާންގެ ޒަޢާމަތުގެ ދަށުން 2030 އަށް އަމާޒުކޮށްފައިވާ ތަޞައްވުރަށް ވާޞިލުވުމަށްޓަކައި ގެންގުޅުއްވާ ޙިކުމަތްތެރި ވިސްނުންފުޅާއި އަދި ހޯއްދަވަމުންގެންދަވާ ކުރިއެރުމުގެ ނަތީޖާގެ ގޮތުގައި ބައިނަލްއަޤުވާމީ މުހައްލިލުން ސިފަކުރެއެވެ.

ސައުދީޢަރަބިއްޔާ އދ ގައި ބައިވެރިވެފައިވަނީ 1945 ވަނަ އަހަރުގެ އޮކްޓޯބަރުމަހުގެ 24 ވަނަ ދުވަހުއެވެ.