ކޮވިޑް-19 އާއި ދެކޮޅަށް ކުރެވޭ ކަންކަމުގައި ކޮރަޕްޝަންގެ ހިރާސްކުޑަކުރުމުގެ އިރުޝާދުނާމާ އާއްމުކޮށްފި
މިފަދަ ދަނޑިވަޅުގައި ކޮރަޕްޝަނަށް އޮންނަ ފުރުސަތު ބޮޑު: އޭސީސީ
އެންޓިކޮރަޕްޝަން ކޮމިޝަންއާއި ރައިސުލްޖުމްހޫރިއްޔާ އިބްރާހިމް މުހައްމަދު ސާލިހު
ކޮވިޑް-19 އާއި ދެކޮޅަށް ކުރެވޭ ކަންކަމުގައި ކޮރަޕްޝަންގެ ހިރާސްކުޑަކުރުމުގެ އިރުޝާދުނާމާ އެންޓި-ކޮރަޕްޝަން ކޮމިޝަން (އޭސީސީ)ން އާއްމުކޮށްފިއެވެ.
ކޮވިޑް-19 އާގުޅޭ އިޖާބައިގެ (ރެސްޕޮންސް) ގޮތުގައި ދައުލަތުން ކުރަމުންގެންދާ މުހިންމު، ބޭނުންތެރި، ބުރަ މަސައްކަތްތަކުގެ މައިގަނޑު މަޤްޞަދު ޙާޞިލުކުރުމަށް ކޮރަޕްޝަނުގެ ސަބަބުން އެޅިދާނެ ހުރަސްތައްކުޑަކުރުމަށް، އެޅިދާނެ ފިޔަވަޅުތަކާއި، ކުރެވިދާނެ ކަންކަމާ ގުޅޭ އިރުޝާދު ދިނުމަށް އާއްމު ކުރެވުނު އިރުޝާދު ނާމާގައި 7 ޕޮއިންޓެއް ފާހަގަކޮށްފައިވެއެވެ.
އޭސީސީން ބުނީ އެކި ކަހަލަ ކާރިސާތަކުގެ ޙާލަތުގައި، އަދި ކާރިސާތަކުގެ ސަބަބުން އިޤްތިޞާދަށް ކުރިމަތިވާ ހީނަރުކަމުގެ ޙާލަތްތަކުގައި، އެ ނޫން ޙާލަތްތަކަށްވުރެ ބޮޑަށް ކޮރަޕްޝަނަށް މަގުފަހިވާކަން ދިރާސާތަކުން އެނގޭކަމަށެވެ. އަދި މިފަދަ ޙާލަތްތަކުގައި، ޚާއްޞަކޮށް ދައުލަތުގެ މުއައްސަސާތަކުގެ އެތެރޭގައި ކޮރަޕްޝަނަށް އޮންނަ ފުރުސަތާއި، އަދި ދައުލަތުގެ ތެރޭގައި ހުންނަ އެކިއެކި ނިޒާމުތަކުގެ ތެރޭގައި ކޮރަޕްޝަނަށް އޮންނަ ހިރާސްވެސް އިތުރުވާކަމަށެވެ.
