ކޭޝްފްލޯ މެނޭޖްކުރުމަށް 4.4 ބިލިއަން ރުފިޔާ މަރުކަޒީ ބޭންކުން ނެގުމަށް ފިނޭންސް މިނިސްޓްރީން ހުށަހަޅައިފި
ކޭޝްފްލޯ މެނޭޖްކުރުމަށް ޕަބްލިކް ބޭންކު އެކައުންޓުން އޯވަރޑްރޯ ކުރެވޭ ލިމިޓް މަތިކުރަންޖެހޭ ކަމަށް ފިނޭންސް މިނިސްޓްރީން ވަނީ ހުށަހަޅާފައި
ފިނޭންސް މިނިސްޓަރ އިބްރާހީމް އަމީރު
ކޮވިޑް-19 އާ ގުޅިގެން ދިމާވާ އިގްތިޞާދީ ދަތިކަމާގުޅިގެން ކުރުމުއްދަތުގައި ދައުލަތުގެ ޚަރަދުތައް ފޫބެއްދުމަށް މަރުކަޒީ ބޭންކުން 4.4 ބިލިއަން ރުފިޔާ ނެގުމަށް ފިނޭންސް މިނިސްޓްރީން ރައްޔިތުންގެ މަޖިލީހަށް ހުށަހަޅައިފި އެވެ.
ފިނޭންސް މިނިސްޓްރީން އެގޮތަށް ހުށަހަޅާފައިވަނީ ކޮވިޑް-19 އާ ގުޅިގެން އަންނަ އިގްތިޞާދީ އަދި މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝްފްލޯ ހޯދުމަށް މަޖިލީހުން ބޭނުންވާ ހުއްދަތަށް ހޯދުމަށް މަޖިލީހަށް ފޮނުވާފައިވާ ކަރުދާހުގަ އެވެ. ކޭޝްފްލޯ މެނޭޖްކުރުމަށް ޕަބްލިކް ބޭންކު އެކައުންޓުން އޯވަރޑްރޯ ކުރެވޭ ލިމިޓް މަތިކުރަންޖެހޭ ކަމަށް ފިނޭންސް މިނިސްޓްރީން ވަނީ ހުށަހަޅާފައެވެ. އެގޮތުން މީގެ ސަބަބުން ދައުލަތުން ކުރު މުއްދަތުގައި ކުރަންޖެހޭ ޚަރަދުތައްކޮށް ޚިދުމަތްދިނުމަށް މަގުފަހިވެގެންދާނެކަމަށް ފިނޭންސް މިނިސްޓްރީން ބުނެއެވެ.
މިގޮތުން 4.4 ބިލިއަން ރުފިޔާ 1 އަހަރު ދުވަހުގެ މުއްދަތަށް ފައިނޭންސް ކޮސްޓެއް ނުހިމެނޭ ގޮތަށް އޯވަރޑްރޯ ކުރެވޭ ގޮތަށް ހަމަޖެހިގެން ދިއުމަކީ ދައުލަތުގެ ޚަރަދުތައް ހަމަޖައްސައި ޚިދުމަތުގެ ކަށަވަރުކަން ދެވޭނެކަމެއްކަމަށް ފިނޭންސް މިނިސްޓްރީން ބުނެއެވެ.
ފިނޭންސް މިނިސްޓްރީން ބުނެފައިވަނީ މީގެ ސަބަބުން ފައިސާ އިތުރުވުމުގެ ސަބަބުން އަންނަ އިޤްތިސާދީ ނޭދެވޭ ބަދަލުތައް މި ދުވަސްވަރު މަދުވާނެކަމަށް ލަފާކުރެވޭ ކަމަށެވެ. ސަބަބަކީ ރާއްޖޭގެ ގިނަ ފަރާތްތަކެއްގެ ވަޒީފާ ގެއްލިފައިވުމާއި، ރާއްޖޭގެ އިޤްތިސާދުގެ އެގްރިގޭޓް ޑިމާންޑް ދަށްވެފައިވުމާ، ދުނިޔޭގެ އިޤްތިސާދީ ހަރަކާތްތައްވެސް މަޑުޖެހިފައިވުމާއި ބޭރުގެ ދަތުރު ފަތުރު މަދުވުމާއި ދުނިޔޭގެ ބާޒާރުގައި ތެލާއި ތަކެތީގެ އަގު ދަށްވެފައިވުމާއި ގުޅިގެން ބޭރު ފައިސާގެ ޑިމާންޑަށް މީގެ ސަބަބުން މި ވަގުތު އިތުރުވުމެއް އަންނާނެކަމަށް ނުބެލެވޭތީކަމަށް ފިނޭންސް މިނިސްޓްރީން މަޖިލީހަށް ފޮނުވާފައިވާ ކަރުދާހުގައި ވަނީ ބުނެފަ އެވެ.
މީގެ އިތުރުން، އިޤްތިސާދީ ހަރަކާތްތައް މަޑުޖެހިފައިވާ މި ދަނޑިވަޅުގައި ފައިސާ އެނބުރޭ މިންވަރު އިތުރުކުރުމަށްވެސް ފިޔަވަޅުއަޅަން ޖެހޭކަމަށް ފިނޭންސް މިނިސްޓްރީން ބުނެއެވެ. ނަމަވެސް މެދު ރާސްތާގައި، މި ކާރިސާއިން އަރައިގަތުމަށްފަހު، މި ބާޒާރުގައި އެނބުރޭ ދިވެހި ފައިސާ މަދުކުރެވޭނެ އިންތިޒާމްތައް ހަމަޖެއްސިދާނެ ކަމަށް ފިނޭންސް މިނިސްޓްރީން ބުނެއެވެ.
އެގޮތުން ފައިނޭންސިންގ އިންފްލޯތައް އަންނަ މިންވަރަކުން ޕަބްލިކް ބޭންކް އެކައުންޓް އޯވަރޑްރޯ ކުރަންޖެހޭ މިންވަރު ކުޑަކުރެވޭނެ ކަމަށް ފިނޭންސް މިނިސްޓްރީން ބުނެއެވެ. މިގޮތުން އޯވަރޑްރޯ ލިމިޓް ވާނީ މި މުއްދަތުގައި ދައުލަތުގެ ކޭޝްފްލޯ މެނޭޖްކުރުމަށް ވެދެވޭ އެހީއަކައަށެވެ. އަދި ދައުލަތަށް އާމްދަނީ އަދި ފައިނޭންސިންގ ލިބޭ މިންވަރަކުން އޯވަރޑްރޯ ކުރަން ޖެހޭ މިންވަރު ކުޑަވާނެ ކަމަށް ފިނޭންސް މިނިސްޓްރީން ބުނެއެވެ.
ފިނޭންސް މިނިސްޓްރީން ވަނީ މިވަގުތު ރާއްޖޭގެ އިޤްތިސާދާއި ދައުލަތުގެ މާލީ ހާލަތު އޮތްގޮތުން ، މިފިޔަވަޅުތައް ގާނޫނީ އިމުގެތެރެއިން އެޅުމަށްޓަކައި ޚަރަދަށް ޒިންމާވުމުގެ ޤާނޫނުގެ 32 ވަނަ މާއްދާގެ (ހ) އާއި، (ރ) އާއި، (ބ) ގައި ބަޔާންކޮށްފައިވާ ހަމަތަކާއި އުސޫލު ތަކަށް އަހަރު ދުވަހުގެ އިސްތިސްނާއެއް ދިނުމަށް މަޖިލީހަށް ހުށަހަޅާފަ އެވެ.
ދައުލަތުގެ ޚަރަދަށް ޒިންމާވުމުގެ ޤާނޫނުގެ 32 ވަނަ މާއްދާގެ (ހ) ގައި ބުނެފައިވަނީ ދައުލަތުގެ މަރުކަޒީ ބޭންކުން ދައުލަތަށް ދަރަންޏަށް ފައިސާ ނެގޭނީ 91 ދުވަހުގެ ތެރޭގައި އެފައިސާ ދައްކާ ހަލާސްކުރާ ގޮތަށް ، އެއިރެއްގެ އިންޓަރެސްޓް ރޭޓަށްވުރެ ދަށް ނޫން ރޭޓެއްގައި އެޑްވާންސެއްގެ ގޮތުގައެވެ. އަދި އެގޮތަށް ފައިސާ ނެގޭނީ ވޭތުވެދިޔަ ތިން އަހަރު ސަރުކާރަށް ލިބުނު ޖުމްލަ އާމްދަނީގެ މައްޗަށް ބިނާކޮށް އަހަރަކަށް ޖެހޭ އެވްރެޖް އާމްދަނީގެ އެއް ޕަސެންޓަށްވުރެ އިތުރު ނުވާ ގޮތަށް ކަމަށްވެސް އެ މާއްދާގައި ވަނީ ބުނެފަ އެވެ.
މިމައްސަލައަށް ބަހުސްކުރުމަށް ބުރާސްފަތި ދުވަހުގެ ޖަލްސާއަށް ވަނީ އެޖެންޑާކޮށްފަ އެވެ.
