ޗައިނާއިން އިއްޔެ 30 މީހުންނަށް ވައިރަސް ޖެހިފައިވޭ

ކޮވިޑް-19 އެންމެ ފުރަތަމަ ފެނުނު ޗައިނާއިން އަންގާރަ ދުވަހު 30 މީހުންނަށް ވައިރަސް ޖެހިފައިވާކަމަށް އެގައުމުގެ ނޭޝަނަލް ހެލްތު ކޮމިޝަނުން ބުނެފި އެވެ.

މީގެތެރެއިން 23 މީހުންނަކީ އެގައުމަށް އެތެރެވި މީހުންކަމަށް ޗައިނާއިން ބުނެއެވެ. މިއީ އޭގެކުރީ ދުވަހާއި އަޅާބަލާއިރު 11 މީހުންގެ އިތުރުވުމެކެވެ. ޗައިނާ ތެރެއިން 7 މީހަކު ޕޮޒިޓިވްވެފައިވެ އެވެ. މިމީހުންނަކީ ޗައިނާ އާއި ރަޝިޔާ ހިއްސާކުރާ ބޯޑަރ ހުންނަ ސަރަހައްދުން ފެނިފައިވާ މީހުންކަމަށް ޗައިނާއިން ބުނެއެވެ.

ވައިރަސްގެ ނިޝާން ގައިގައި ހުންނަކަން ނޭންގި ނުވަތަ އަލާމާތެއް ނުފެނި އަންގާރަ ދުވަހު އެގައުމުގެ 42 މީހަކު ވައިރަސް އަށް ވަނީ ޕޮޒިޓިވްވެފަ އެވެ. އޭގެކުރީ ދުވަހު އެގޮތަށް ޕޮޒިޓިވްވެފައިވަނީ 37 މީހުންނެވެ. ޗައިނާގެ ތެރެއިން މިގޮތަށް ވައިރަސް އަށް ޕޮޒިޓިވްވެފައިވާ މީހުންގެ އަދަދު އެއްހާހަށްވުރެ މަތިކަމަށް ޗައިނާއިން ހާމަކުރެ އެވެ.

އަންގާރަ ދުވަހު ޗައިނާއިން އެއްވެސް މީހަކު ވައިރަސް ޖެހިގެން މަރުވެފައެއްނުވެ އެވެ. އަދި 28 މީހަކު ވަނީ ރަނގަޅުވެގެން ދޫކޮށްލާފަ އެވެ.

މިހާތަނަށް އައިއިރު ޗައިނާއިން މިވައިރަސް އަށް 82,788 މީހުން ވަނީ ޕޮޒިޓިވްވެފަ އެވެ. އަދި 4,632 މީހުން ވަނީ ވައިރަސް ޖެހިގެން މަރުވެފަ އެވެ.