ތަކަންދޫ މޮނިޓަރިންގ ހާލަތަށް ގެނެސްފައިވާތީ ކުއްލި ހާލަތު އިޢުލާންކޮށްފި

ހއ. ތަކަންދޫ މޮނިޓަރިންގ ހާލަތަށް ގެނެސްފައިވާތީ ތަކަންދޫގައި ކުއްލި ހާލަތު އިޢުލާންކޮށް ރައްޔިތުން ޢަމަލުކުރަންވީ ގޮތުގެ އުސޫލެއް އާންމުކޮށްފިއެވެ.

ތަކަންދޫ ކައުންސިލުން ނެރިފައިވާ އުސޫލުގައި ބުނެފައިވަނީ ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިފައިވާ ޤާނޫނީ އިޚްތިޔާރުތަކުގެ ތެރެއިން، އެރަށަށް ދަތުރުކޮށްފައިވާ އުޅަނދެއްގައި ހުރި މީހެއްގެ ކިބައިން ކޮވިޑް 19 އަށް ޝައްކުކުރެވޭ ޢަލާމާތްތަކެއް ފެނުމާއި ގުޅިގެން، ޞިއްޙީ ގޮތުން އިތުރަށް ބަލަންޖެހޭ ކަންކަން ބެލުމަށްޓަކައި ތަކަންދޫ މޮނިޓަރިންގ ހާލަތައް ގެނެވިފައިވުމާއެކު، ދިވެހިރާއްޖޭގެ އިދާރީ ދާއިރާތައް ލާމަރުކަޒި އުސޫލުން ހިންގުމުގެ ޤާނޫނުގެ 23 ވަނަ މާއްދާގެ ދަށުން މޮނީޓަރިންގ ހާލަތުގައި އަމަލުކުރާނެ ގޮތްތަކެއް ކަނޑައަޅާފައިވާ ކަމަށެވެ.

އެގޮތުން ގެއިން ބޭރަށް ނިކުމެ އުޅުން އެއްކޮށް މަނާކުރުމާއި، ރަށަށް އަރާ ފޭބުން އެއްކޮށް މަނާކުރުމާއި، ކޮންމެ ގޭބިސީއެއްގައި ބައްޔަށް ޝައްކު ކުރެވޭ މީހުން ގައިދުރުކޮށް ދިރިއުޅެވޭނެ އިންތިޒާމް ހަމަޖެއްސުން ހިމެނެއެވެ. އަދި ކަރަންޓީންކުރެވޭ ފަރާތްތަކަށް ބޭނުންވާ ކާބޯތަކެއްޗާއި ޒަރޫރީ ބޭނުންތައް ފުއްދޭނެ އިންތިޒާމް ކަރަންޓީން ކުރެވޭ ފަރާތުން ނުވަތަ އެފަރާތުގެ އާއިލާއިން ހަމަޖެއްސުމަށް ދަތިވެއްޖެނަމަ ކޮވިޑް 19 ޓާސްކް ފޯސްގެ ފަރާތުން އެ ތަކެތި އެފަރާތްތަކަށް ފޯރުކޮށްދެވޭނެ ކަމަށެވެ.

މީގެ އިތުރުން މިސްކިތްތަކުގައި ޖަމާޢަތުގައި ނަމާދުކުރުން މެދުކަނޑާލުމާއި، ކަރަންޓީން ކުރެވޭ ފަރާތްތަކަށް ބޭނުންވާ ކާބޯތަކެއްޗާއި ޒަރޫރީ ބޭނުންތަކަށް ބޭނުންވާ ތަކެތި ފިހާރަތަކުން ޑެލިވަރީ ކޮށްދިނުމުގެ އިންތިޒާމް ހަމަޖައްސަވައި ދެވޭނެ ކަމަށް ބުނެފައިވެއެވެ. އަދި ޑޮކްޓަރަށް ދެއްކުމަށް ދުރުވާ ފަރާތްތަކުން މަރުކަޒުގެ ފާމަސީއާއި ދިމާލުގެ އުތުރު ފަރާތު ދޮރު ބޭނުން ކުރުމާއި، ކޮވިޑް 19 ތަކަންދޫ ޓާސްކް ފޯހުގެ ފަރާތުން އަޅާވާފައިވާ އެންމެހާ ފިޔަވަޅުތަކަށް ފުރިހަމައަށް ޢަމަލުކުރުމާއި، ކޮވިޑް 19 އިން ރައްކާތެރިވުމަށް ކަމާބެހޭ އިދާރާތަކުން ދެއްވާ އިރުޝާދުތަކާއި އެއްގޮތަށް ޢަމަލުކުރުން ހިމެނެއެވެ.

ކޮވިޑް-19 ތަކަންދޫ ޓާސްކްފޯސްގެ ހޮޓްލައިން ނަންބަރަކީ 9925489 އެވެ.

ތަކަންދޫ ކައުންސިލުން ބުނީ ކޮވިޑް-19 އާއި ގުޅިގެން، ކުރުމަށް އަންގާފައިވާ ކަންކަމަށް ރައްޔިތުން ފުރިހަމައަށް ޢަމަލުކުރުމަށް ވަނީ އަންގާފައެވެ. އަދި ރަށް މޮނިޓރިންގ ހާލަތަށް ގެނެވިފައި ވަނީ ގިނަ ބަޔަކު އެ އުޅަނދުން ރަށަށް ދަތުރު ކޮއްފާވާތީ ކަމަށެވެ. އަދި މީގެ އިތުރުން ރަށުގައި ދިރިއުޅޭ އާބާދީ ގެ ގިނަ ބަޔަކީ މި ބަލި ޖެހުމުގެ ފުރުސަތު ބޮޑު ބަޔަކު ދިރިއުޅޭ ރަށެއްކަމަށް ފާހަގަ ވެފައިވާތީ ކުއްލި ހާލަތަށް ގެންނަން ނިންމީ ކަމަށް ކައުންސިލުން ބުނެއެވެ.