މި ހާލަތުން އަރައިގަންނަން މަދުވެގެން ތިން މަސް ނަގާނެ: ޑރ އަފްޒަލް
ލޮކްޑައުން ''އެފެކްޓިވް'' ކަމަށް ވިދާޅުވި
އެޕިޑަމޮލޮޖިސްޓް ޑރ. އިބްރާހިމް އަފްޒަލް
ރާއްޖޭގައި ކޮވިޑް-19 ކޮންޓްރޯލް ކުރަން މަދުވެގެން ތިން މަސް ދުވަސް ނަގާނެ ކަމަށް ޓެކްނިކަލް އެޑްވައިޒަރީ ގްރޫޕް (ޓެގް) އިން ބުނެފި އެވެ.
މާލެ ސިޓީއިން ވައިރަސް ފެނުމާއެކު، އެޗްޕީއޭއިން ވަނީ މި ސަރަހައްދު އެއްކޮށް ލޮކްޑައުންކުރަން ނިންމާފަ އެވެ. އަދި އެންމެ ފުރަތަމަ ކޭސް ފެނުނީ އެއްވެސް ޓްރެވަލް ހިސްޓްރީއެއް ނެތް ފަރާތަކަށް ވުމާއެކު، މާލެ ސިޓީގެ އެލަރޓް ލެވަލް ވަނީ ރަތަށް ބަދަލުކޮށްފަ އެވެ. އެޗްޕީއޭއިން ވަނީ ވައިރަސް ފެތުރުން ކޮންޓްރޯލް ކުރުމުގެ ގޮތުން އެޕްރިލް މަހުގެ 30 ވަނަ ދުވަހާ ހަމައަށް މާލެ ސިޓީގެ ލޮކްޑައުން މުއްދަތު އިތުރުކުރަން ނިންމާފަ އެވެ.
ލޮކްޑައުންގެ ނަތީޖާއާ ގުޅޭގޮތުން ނޫސްވެރިޔަކު ކުރި ސުވާލަކަށް ޖަވާބުދެއްވަމުން ޑރ. އަފްޒަލް ވިދާޅުވީ ލޮކްޑައުންގެ ނަތީޖާ "ރަނގަޅު" ކަމަށެވެ. އަދި ލޮކްޑައުން ކުރުމާއެކު، ގިނަ ބަޔަކު ގޭގައި މަޑުކުރަމުންދާ ކަމަށެވެ. މިހާރުގެ ލޮކްޑައުން ހާލަތު ޑރ. އަފްޒަލް ސިފަކުރެއްވީ ސްޓްރޯންގެ ލޮކްޑައުންއެއްގެ ގޮތުގަ އެވެ.
މިކަމާއި ގުޅިިގެން، މިހާރު ފެންނަ ޑައިރެކްޓް ކޮންޓެކްޓްސް އަދަދު ވަރަށް ބޮޑުތަނުން މަދުވެފައިވާ ކަމަށް ވިދާޅުވި އެވެ. އަދި މި ދުވަސްވަރު އެކަކު އަނެކަކަށް ވައިރަސް ފެތުރިގެން ދިއުމުގެ ފުރުސަތު ކުޑަކަމަށް ވިދާޅުވި އެވެ.
ރާއްޖޭގައި ކޮވިޑް-19 ބަލި ކޮންޓްރޯލް ކުރެވެން ކިހާ ދުވަހެއް ނަގާނެތޯ ނޫސްވެރިޔަކު ސުވާލު ކުރުމުން ޑރ. އަފްޒަލް ވިދާޅުވީ، ބަލި ޖެހޭ އަދަދު މަދުވަމުން ދިޔަ ކަމުގައިވީނަމަވެސް އެމީހުން ރަނގަޅުވަންދެން އަޅަން ޖެހޭ ފިޔަވަޅުތައް ތިން މަހަށް ދެމިގެންދާނެ ކަމަށް ގަބޫލްކުރެވޭ ކަމަށެވެ.
މާލެއިން ކޮވިޑް-19 ކޭސްއެއް ފުރަތަމަ ފަހަރަށް ރިޕޯޓް ކޮށްފައިވަނީ މި މަހުގެ 15 ވަނަ ދުވަހު އެވެ. އެއާއެކު މާލެ އިން ފެނިފައިވާ ކޭސްތަކުގެ އަދަދު ވަނީ ދުވަހަކަށް ވުރެ ދުވަހެއް އިތުރުވާން ފަށާފަ އެވެ. މިހާތަނަށް މާލެއިން ވަނީ 60 އަށް ވުރެ އިތުރު ކޭސް ފެނިފަ އެވެ.
