ބަންގުލަދޭޝުން އެހީ ހިފައިގެން އައި ބޯޓުގައި 20،000 ސެޓް ޕާރސަނަލް ޕްރޮޓެކްޝަން އިކްވިޕްމަންޓް (ޕީޕީއީ) އަދި އިތުރު ސާމާނު ހުންނާނެކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއޯއީސީ) ގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.

ޕީޕީއީ އަކީ ގައިންގަޔަށް ބަލި އެރުން ހުއްޓުވުމަށް ބޭނުންކުރާ ހަޒްމަޓް ސޫޓް ކަހަލަ އެއްޗެކެވެ. އަދި މި ބޭނުންކުރާނީ ކޮވިޑް-19 ގެ ކޭސްތަކުގައި ފުރަންޓްލައިންގައި މަސައްކަތް ކުރާ ފަރާތްތަކުންނެވެ.

މަބްރޫކް ވިދާޅުވީ ރާއްޖޭގައި ޕާރސަނަލް ޕްރޮޓެކްޓިވް އިކްވިޕްމަންޓް އިތުރުކުރަމަށް މަސައްކަތްތަކެއް ކުރެވުމުންދާ ކަމަށެވެ. އެގޮތުން ރާއްޖެއަށް ބަންގުލަދޭޝުން އައި ބޯޓު މާދަމާ ތަކެތި ބާލާނެ ކަމަށެވެ. އަދި އެ ބޯޓުގައި 20،000 ސެޓް ޕީޕީއީއާއި އައި 960 ޕްރޮޓެކްޝަން ގޮގުލް އަދި 5000 ޕީސް ހޭންޑް ސެނެޓައިޒާ އެބަހުރި ކަމަށެވެ.

މީގެއިތުރުން ބަލިމީހުންނަށް ބޭނުންވާ ބޭހާއި، ކަނާގެ ބާވަތްތައް އަދި ތަރުކާރީގެ ބާވަތްތައް ހިމެނޭކަމަށްވެސް މަބްރޫކް ވިދާޅުވިއެވެ. އަދި މި ބޯޓު ރާއްޖެއަށް ތަކެތި ބާލާނީ މާދަމާގެ ވަގުތެއްގައި ކަމަށް ވެސް މަބްރޫކް ވިދާޅުވިއެވެ.

މަބްރޫކް ވިދާޅުވީ ޓެސްޓް ކިޓުގެ އަދަދުތަކަށް ބަލާލާއިރު މިވަގުތު 3050 ޓެސްޓް ކިޓު އެބަހުރި ކަމަށެވެ. އަދި މި ބުރާސްފަތި ދުވަހުގެ ކުރިން 5000 ކިޓު ލިބޭނެކަމަށް އުއްމީދު ކުރައްވާ ކަމަށެވެ.

ކޮވިޑް 19އާ ގުޅިގެން ބަންގްލަދޭޝުން ވަނީ ރާއްޖެއަށް 100 ޓަނުގެ ތަކެތި ހަދިޔާކޮށްފައެވެ. ފޮރިން މިނިސްޓްރީން ބުނީ، ބަންގްލަދޭސްއިން ރާއްޖެއަށް ހަދިޔާ ކުރި ތަކެތީގައި ކާޑުގެ ބާވަތްތަކާއި ރާއްޖޭގައި އާންމުކޮށް ކެއުމަށް ބޭނުން ކުރާ މޭވާ އަދި ތަރުކާރީގެ ބާވަތްތަކުގެ އިތުރުން ކޮވިޑް 19އާ ދެކޮޅަށް ކުރާ މަސައްކަތުގައި ބޭނުންކުރާ އެކި މެޑިކަލް އާލާތްތައް ހިމެނޭ ކަމަށެވެ. އަދި އެތަކެތި ރާއްޖެ ގެންނަނީ ބަންގްލަދޭޝްގެ ނޭވީގެ މަނަވަރެއްގައި ކަމަށާއި، އެ މަނަވަރު ރާއްޖެ އައުމަށް މިމަހު 15 ގައި އެގައުމުން ފުރާފައިވާކަމަށް ފޮރިން މިނިސްޓްރީން ބުނެއެވެ.