ބަންގްލަދޭޝްގެ ދެ މީހަކަށް އަދުހަމްގެ ދީލަތި އެހީއެއް

މި ވަގުތު ދަތި ހާލުގައި އުޅޭ ބަންގްލަދޭޝް މީހުންނަށް އެހީވުމުގެ ގޮތުން ގައުމީ ޓީމުގެ ކުރީގެ ކުޅުންތެރިޔާ ހަސަން އަދުހަމް (ސަޑޭ) އިސްނަގައިފަ އެވެ.

ކުރިން ނިއުރޭޑިއަންޓް ސްޕޯޓްސް ކްލަބު، ކްލަބު ވެލެންސިއާ އަދި މާޒިޔާ ސްޕޯޓްސް އެންޑް ރެކްރިއޭޝަނަށްވެސް ކުޅެފައިވާ އަދުހަމް ނިންމާފައިވަނީ ކުރިއަށް އޮތް ރަމަޟާން މަހުގައި ބަންގްލަދޭޝްގެ ދެ މީހަކަށް ރޯދަ ވީއްލުމާއި ތަރާވިސް އަދި ހާރުކާން ބޭނުންވާ ކާބޯތަކެތި ފޯރުކޮށްދިނުމަށެވެ.

އަދުހަމް ކުރި ޓްވީޓެއްގައި ވަނީ ހުޅުމާލޭގައި އުޅޭ ބަންގްލަދޭޝް މީހުންގެ ތެރެއިން އެކަމަށް ބޭނުން ޖެހިފައިވާ މީހެއް އުޅޭނަމަ، އޭނާ އާއި މައުލޫމާތު ހިއްސާ ކުރުމަށް އާންމުންގެ ކިބައިން އެދިފައެވެ.

ބަންގްލަދޭޝް ދެ މީހަކަށް އެހީވަން އަދުހަމް ނިންމިއިރު، ކޮރޯނާވައިރަސް (ކޮވިޑް-19) އާ ގުޅިގެން ރާއްޖޭގައި އުޅޭ ގިނަ އަދަދެއްގެ ބަންގްލަދޭޝް މީހުން ވަނީ ހާލުގައި ޖެހިފައެވެ. ކޮވިޑް-19 އާ ގުޅިގެން ދަތި ހާލުގައި އުޅޭ ބިދޭސީން، ހާލަތު ރަނގަޅު ތަންތަނަށް ބަދަލު ކުރުމުގެ މަސައްކަތް ސަރުކާރުން ދަނީ ކުރަމުންނެވެ.

ކޮވިޑް-19 ގެ އަސަރު މުޅި ރާއްޖެއަށްވެސް ކޮށްފައިވާއިރު، ކުޅިވަރު އާއިލާގެ އެކި ފަރާތްތަކުން އަންނަނީ އެކި ގޮތްގޮތުން އެހީތެރިކަން ފޯރުކޮށްދެމުންނެވެ. އެގޮތުން ހދ. ނޮޅިވަރަންފަރު ގޭގެއަށް ކާޑު އުފުލުމުގައި ގައުމީ ފުޓްބޯޅަ ޓީމުގެ މިޑްފީލްޑަރު އިބްރާހިމް ވަހީދު ހަސަން (އިއްބެ) ވަނީ ހަރަކާތްތެރިވެފައެވެ. އަދި ކުޅިވަރާ ބެހޭ ވަޒީރު އަހުމަދު މަހުލޫފާއި ވޮލީބޯޅަ އެސޯސިއޭޝަނުގެ އެންމެ އިސް މަސްއޫލިއްޔަތާ ހަވާލުވެހުރި ކުރީގެ އެއްވަނަ ކުޅުންތެރިޔާ މުހައްމަދު ސާޖިދު (ކާއްޓޭ) ގެ އިތުރުން ވޮލީ ބައެއް ކުޅުންތެރިންވެސް ވަނީ އާންމުންނަށް އެހީ ފޯރުކޮށްދިނުމުގައި ބައިވެރިވެފައެވެ.