ޗެމްޕިއަންސް ލީގު ސިޓީއާއި އެކު ނުހޯދިއްޖެނަމަ ވާނީ ފެއިލްވެފައިވާ މީހަކަށް: ގާޑިއޯލާ
2 ފެބުރުއަރީ 2020 | އާދީއްތަ 11:34ސިޓީ އާއިއެކު ގާޑިއޯލާ އަށް ޗެމްޕިއަންސްލީގުގެ ސެމީއަކަށް ނުދެވޭ
ގާޑިއޯލާ ބާސެލޯނާއާއިއެކު ޗެމްޕިއަންސް ލީގު ތަށި އުފުލައިލަނީ
އިނގިރޭސި ކްލަބް މެންޗެސްޓާ ސިޓީއާއިއެކު ޗެމްޕިއަސް ލީގު ކާމިޔާބު ނުކުރެވިއްޖެނަމަ ވެގެންދާނީ "ފެއިލް" ވެފައިވާ މީހަކަށް ކަމަށް އެ ކްލަބްގެ ކޯޗު ޕެޕް ގާޑިއޯލާ ބުނެފިއެވެ.
ސިޓީއަށް ގާޑިއޯލާ ބަދަލުވުމަށްފަހު ފަސް ތަށި އެކްލަބާއިއެކު ކާމިޔާބުކޮށްފައިވާ ގާޑިއޯލާ ވަނީ ސިޓީ އާއިއެކު ގިނަ ރެކޯޑްތަކެއް ހަދައިފައެވެ. ނަމަވެސް ގާޑިއޯލާއަށް ސިޓީއާއިއެކު ޗެމްޕިއަންސް ލީގު ތައްޓެއް މިހާތަނަށް ހޯދިފައެއް ނުވެއެވެ. ކުރިން ބާސެލޯނާ އަދި ބަޔާންއަށް ކޯޗުކަން ކޮށްދިން ކޯޗު ވަނީ ބާސާ އަދި ބަޔާން އާއިއެކު ވެސް ކާމިޔާބީ ހޯދައިފައެވެ.
ގާޑިއޯލާ ބުނީ ނިމިދިޔަ ސީޒަން ސިޓީއަށް ވެގެންދިޔައީ ކާމިޔާބު ސީޒަންއަކަށް ކަމަށާއި ނަމަވެސް ސިޓީ އިން ޗެމްޕިއަންސް ލީގު ނުހޯދާތީ އެ ވާހަކަ މީހުން ދައްކާކަމަށެވެ. އަދި މީހުން އޭނާ "ޖަޖް" ކުރާނެ ކަމަށާއި ސިޓީއާއިއެކު ހަދައިފައިވާ އެއްބަސްވުން ހަމަވާއިރު ސިޓީއަށް ޗެމްޕިއަންސް ލީގު ތައްޓެއް ނުހޯދިއްޖެނަމަ އޭނާ ވަނީ "ފެއިލިއާ" އަކަށް ކަމަށް ގާޑިއޯލާ ބުންޏެވެ.
ގާޑިއޯލާގެ ކޯޗުކަމުގެ ދަށުގައި ސިޓީއަށް މިހާތަނަށް ޗެމްޕިއަންސް ލީގުގެ ކުއާޓާ ފައިނަލް ފަހަނަ އަޅައިފައެއް ނުދެވެއެވެ.
ޓޮޓެންހަމާއި ދެކޮޅަށް ލީގުގައި އާދީއްތަ ދުވަހުގެރޭ ނިކުންނަ މެޗުގެ ކުރިން ވާހަކަދައްކަމުން ގާޑިއޯލާ ބުނީ މޮރީނިއޯގެ އިރުޝާދުގެ ދަށުން ޓޮޓެންހަމްއިން ދުވަހެއް ދުވަހަކަށް އަންނަނީ އެޓީމުގެ ކުޅުން ރަނގަޅު ކުރަމުން ކަމަށާއި، އެންމެފަހުން ސަދަމްޕްޓަން އާއި ދެކޮޅަށް ކުޅުނު މެޗުގައި ވެސް ޓޮޓެންހަމްއިން ރަނގަޅަށް ކުޅުނު ކަމަށެވެ. އެހެންކަމުން ޓޮޓެންހަމްއާއި ދެކޮޅަށް ކުޅޭ މެޗުން މޮޅުވާން އުނދަގޫވާނެ ކަމަށާއި ނަމަވެސް ސިޓީއިން މި މެޗަށް ނުކުންނާނީ މޮޅުވާން ކަމަށެވެ.
ސިޓީ އަދި ޓޮޓެންހަމް ބައްދަލުކުރާ މެޗު އޮންނާނީ އާދީއްތަ ދުވަހުގެރޭ 21:30 ގައެވެ.
