މިއަދު ފެނުނު ކޭސްތަކުގެ ތެރޭގައި އެމްއެންޑީއެފް އޮފިޝަލެއް އަދި ފުރަން ގޮސް ތިބި ބިދޭސީން!
މާލެ ސަރަޙައްދު ވަނީ ލޮކްޑައުން ކުރެވިފައި
ޑރ އިބްރާހިމް އަފްޒަލް
އަންގާރަ ދުވަހު މާލޭ ސަރަޙައްދުން ފެނުނު ކޮވިޑް-19 ގެ ކޭސްތަކުގެ ތެރޭގައި އެމްއެންޑީއެފްގެ އޮފިޝަލަކާއި، ރާއްޖެއިން ފުރަން ގޮސް ތިބި ބިދޭސީންތަކެއް ހިމެނޭކަމަށް ސަރުކާރުން ހާމަކޮށްފިއެވެ.
އަންގާރަ ދުވަހު ނޭޝަނަލް އެމަރޖެންސީ އޮޕަރޭޝަންސް ސެންޓަރ(އެންއީއޯސީ) ގައި ބޭއްވި ނޫސްވެރިންގެ ބައްދަލުވުމެއްގައި އެޗްޕީއޭގެ އެޕިޑެމިއޮލޮޖިސްޓް ޑރ އިބްރާހިމް އަފްޒަލް ވަނީ މާލޭ ސަރަޙައްދުން ފަހުން ފެނުނު ކޭސްތަކުގެ ތަފްސީލުތައް ހާމަކުރައްވާފައެވެ.
އެގޮތުން އޭގެ ތެރޭގައި އެމްއެންޑީއެފްގެ އޮފިޝަލެއްވެސް (ކޭސް 69) ހިމެނޭއިރު، އޭނާއާ ގުޅިގެން ކޮންޓެކްޓް ޓްރޭސިންގ ގެ މަސައްކަތް ކުރަމުންދާ ކަމަށާއި، އޭނާއަކީ ފްރޮންޓްލައިންގައި މަސައްްކަތް ކުރި މީހެއްކަން ނުވަތަ ނޫންކަން ކަށަވަރު ކުރުމުގެ މަސައްކަތް ކުރަމުންދާކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކް އަޒީޒްވެސް ވިދާޅުވެފައިވެއެވެ.
އޭގެ އިތުރުން، ޕޮޒިޓިވްވި މީހުންގެ ތެރޭގައި މާލެއިން ފުރަން ގޮސް ތިބި ބިދޭސީންތަކެއް (ކޭސް 76، 77، 78) ހިމެނޭކަން ފާހަގަކުރައްވައި ޑރ އަފްޒަލް ވިދާޅުވީ، އެމީހުން އިމާދުއްދީން ސުކޫލުގައި ބައިތިއްބާފައި ފުރަން ގޮސް ޓެސްޓް ހެދިއިރު ޕޮޒިޓިވްވެފައިވާ ކަމަށެވެ.
ޑރ އަފްޒަލް ވަނީ އަންގާރަ ދުވަހު ފެނުނު އެހެން ކޭސްތަކުގެ ތަފްސީލުތައްވެސް ހާމަކުރައްވާފައެވެ.
