104 ދުވަސް ފަހުން ވޫހާން ޓީމު އެނބުރި ގައުމަށް

ޗައިނީޒް ސުޕަ ލީގުގައި ކުޅެމުން އަންނަ ވޫހާން ޒާލް ފުޓްބޯޅަ ޓީމު، 104 ދުވަސް ފަހުން އެނބުރި ގައުމަށް އަތުވެއްޖެއެވެ.

ވައިނާގައި ކޮރޯނާވައިރަސް (ކޮވިޑް-19) އެންމެ ފުރަތަމަ ފެތުރެން ފެށިއިރު، ވުހާންގެ ފުޓްބޯޅަ ޓީމު ގޮސް ތިބީ ޓްރެއިނިން ކޭމްޕެއްގައި ސްޕެއިންގައެވެ. ސްޕެއިންގައި އެ ޓީމުން ހޭދަކުރި މުއްދަތުގައި ރެއާލް މެޑްރިޑާއި ބާސެލޯނާގެ އެހީތެރިކަން ވެސް ލިބުނެވެ.

ފަހުން ސްޕެއިންގައި ވެސް ވައިރަހުގެ ނުރައްކާ ބޮޑުވުމާއި ގުޅިގެން ވުހާން ޓީމު ދިޔައީ ޖަރުމަނަށެވެ. އަދި އެއަށްފަހު އެނބުރި ވުހާނަށް އެ ޓީމު ދިޔައީ 104 ދުވަހަށް ފަހު އެވެ.

އެޓީމު އެނބުރި ވޫހާނަށް ދިޔުމުން ސަޕޯޓަރުންނާއި ކުޅުންތެރިންގެ އާއިލާތަކުން ވަނީ ހޫނު މަރުހަބާއެއް ކިޔައިފައެވެ. ލޮކްޑައުނަށްފަހު ވޫހާން ސިޓީ ހުޅުވާލިތާ އަދި މާ ގިނަ ދުވަހެއް ނުވެއެވެ.

ކޮވިޑް-19 ކޮންޓްރޯލް ކޮށް، ވޫހާން ސިޓީ ހުޅުވާލި ނަމަވެސް، ފެބްރުއަރީ 22 ގައި ފަށަން ތާވަލުކުރި ލީގު، އަލުން ފަށާނެ ތާރީޚެއް އަދި ނިންމާފައެއް ނުވެއެވެ.

އެކަމަކު ރިޕޯޓުތައް ބުނާ ގޮތުން ޗައިނީޒް ސުޕަ ލީގު އަންނަ ޖޫން މަހު ފެށުމަށް ޗައިނާގެ ފުޓްބޯޅަ ފެޑެރޭޝަނުން މިހާރު އަންނަނީ މަސައްކަތް ކުރަމުންނެވެ. އެއާއެކު ކްލަބުތަކުން މިހާރު ވަނީ ފަރިތަކުރުންތައް ފަށާފައެވެ.

މިދިޔަ އާދީއްތަ ދުވަހު ވޫހާން ޓީމު އެނބުރި ގައުމަށް ދިޔައިރު، ޓީމުގެ ކުޅުންތެރިން އާއިލާއާ އެކު ވަގުތު ހޭދަކުރަން ފުރުސަތު ދިނުމަށް ފަހު، ވަރަށް އަވަހަށް ފަރިތަކުރުންތައް ފަށާނެ ކަމަށް އެ ޓީމުގެ ކޯޗު ހޯސޭ ގޮންޒާލޭޒް ވަނީ ބުނެފަ އެވެ.

ކޮވިޑް-19 އާ ގުޅިގެން ޗައިނީޒް ސުޕަ ލީގު މެދު ކަނޑާލާފައިވާއިރު، ޗައިނީޒް ސުޕަ ލީގުގައި ކުޅޭ ބިދޭސީ ކުޅުންތެރިންގެ ތެރެއިން ކޮވިޑް-19 އަށް ޕޮޒިޓިވްވީ ބެލްޖިއަމްގެ މިޑްފީލްޑަރު މަރުއާން ފެލައީނީ އެވެ. ބެލްޖިއަމްގައި ގިނަ ދުވަސްތަކެއް ވަންދެން މަޑުކުރުމަށް ފަހު، ފެލައިނީ ވަނީ މާޗު މަހު ކުރީކޮޅުގައި ރާއްޖެ އަށް ޗުއްޓީއަކަށްވެސް އައިސްފަ އެވެ. ފެލައިނީ، ކޮވިޑް-19 އަށް ޕޮޒިޓިވްވީ އެނބުރި ޗައިނާ އަށް ދިޔަ ފަހުންނެވެ. ހޮސްޕިޓަލްގައި ފަރުވާ ދިނުމަށްފަހު، ކޮވިޑް-19 އިން ސަލާމަތްވުމުން ފެލައިނީ މިހާރު ވަނީ ހޮސްޕިޓަލުން ދޫކޮށްލާފައެވެ.