މިއަދު ޕޮޒިޓިވްވި މީހުންގެ ތެރެއިން 80 އަހަރުގެ މީހަކު ދަރުމަވަންތަ ހޮސްޕިޓަލަށް ބަދަލުކުރަނީ

އަންގާރަ ދުވަހު މާލެ ސަރަޙައްދުން ކޮވިޑް-19 އަށް ޕޮޒިޓިވްވި މީހުންގެ ތެރެއިން އުމުރުންދުވަސްވީ މީހަކު އިތުރު ފަރުވާއަށް ދަރުމަވަންތަ ހޮސްޕިޓަލަށް ބަދަލު ކުރުމުގެ މަސައްކަތް ފަށައިފިއެވެ.

އަންގާރަ ދުވަހު ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ކުރި ޓްވީޓެއްގައި ބުނީ، ޕޮޒިޓިވްވި މީހުންގެ ތެރޭގައި ހިމެނޭ 80 އަހަރުގެ މީހަކު (ކޭސް 081) ދަރުމަވަންތަ ހޮސްޕިޓަލުގެ 11 ވަނަ ފަންގިފިލާއަށް ބަދަލުކުރުމުގެ މަސައްކަތް ފަށާފައިވާ ކަމަށެވެ.

އެޗްޕީއޭއިން އެހެން ބުނެފައިވާއިރު، އުމުރުން ދުވަސްވީ މީހުންނާއި، އިތުރު ފަރުވާދޭން ޖެހޭ މީހުންގެ އިތުރުން ޑޮކްޓަރުން ގާތުން ބަލަން ބޭނުންވާ ބައެއް މީހުން މީގެ ކުރިންވެސް އައިސޮލޭޝަން ފެސިލިޓީތަކުން ދަރުމަވަންތަ ހޮސްޕިޓަލަށް ބަދަލުކުރެވިފައިވެއެވެ.

އަންގާރަ ދުވަހުގެ 14:30 ގެ ނިޔަލަށް މާލޭ ސަރަޙައްދުން 15 މީހަކު ކޮވިޑް-19 އަށް ޕޮޒިޓިވްވެފައިވާއިރު، އޭގެ ތެރޭގައި 8 ދިވެހިންނާއި 5 ބިދޭސީން ހިމެނެއެވެ.