މިފްކޯ އިން ގޭގެއަށް ޑެލިވަރީކޮށްދިނުން ހުއްޓާލައިފި

މިފްކޯ އިން ގޭގެއަށް ޑެލިވަރީކޮށްދިނުމުގެ ހިދުމަތް ހުއްޓާލައިފިއެވެ.

އެކަމާއި ގުޅޭގޮތުން މިފްކޯއިން ބުނެފައިވަނީ މިހާރު ހާލަތުހުރިގޮތުން މުވައްޒިފުންނާއި ކަސްޓަމަރުންގެ ސަލާމަތަށް ވިސްނާ ގޭގެއަށް ގެންގޮސްދިނުމުގެ ޙިދުމަތް މެދުކަނޑާލާކަމަށެވެ. އަދި ރަޖިސްޓްރީ ކޮށްފައިވާ ވިޔަފާރިތަކުން ހުޅުމާލެ އަދި މާފަންނުގެ މިފްކޯ މަސްފިހާރައަށް ދިޔުމުން ހިދުމަތް ލިބޭނެކަމަށް މިފްކޯއިން ބުނެއެވެ.

ޚިދުމަތް ލިބޭނީ ހެނދުނު 9:30 އިން ހަވީރު 6:00 އަށެވެ. މިކަމާއި ގުޅޭގޮތުން އިތުރު މައުލޫމާތު "ރާއްޖެ އެމްވީ" އަށް ދެއްވަމުން މިފްކޯގެ މެނޭޖަރ ނަވާޒު ރަޝީދު ވިދާޅުވީ މިގޮތަށް ނިންމަންޖެހުނީ މިހާރު މާލޭގެ ހާލަތު ހުރިގޮތުން މުވައްޒަފުންގެ ސަލާމަތާއި ރައްކާތެރިކަމަށް ބެލުމަށްފަހު ކަމަށެވެ. އަދި ޑެލިވަރީ ކުރުން ހުއްޓާލިއިރު ހާހަށްވުރެ ގިނަ އޯޑަރު ލިބިފައިވާކަމަށާއި މީގެތެރެއިން ފައިސާ ދައްކާފައި ހުރި ފަރާތްތަކުގެ އޯޑަރުތަކާމެދު ކަންތައްކުރާނެ ގޮތަކާއި މެދު މިހާރު މަޝްވަރާކުރަމުންދާ ކަމަށް ނަވާޒު ވިދާޅުވި އެވެ.

ހޯލްސޭލްކޮށް މަސްދަޅު ގަންނަ ފަރާތްތަކުންވެސް މިފްކޯ މަސްފިހާރައަށް އައުމުން މަސްދަޅު ލިބޭނެކަމަށް ނަވާޒު ވިދާޅުވި އެވެ.

ހިދުމަތް ހޯދުމަށް އާންމު ރައްޔިތުން އަންނައިރު މާސްކް އަޅައިގެން އަދި އަންގި ލައިގެން އައުމަށް މިފްކޯއިން އިލްތިމާސްކުރެ އެވެ. އަދި ޚިދުމަތްދެވޭނީ ހުއްދަދެވިފައިވާ އުޅަނދުފަހަރަށް އަދި ކަސްޓަމަރުންނަށް ކަމަށް މިފްކޯއިން ބުނެއެވެ.

މީގެއިތުރުން މިފްކޯއިން ބުނީ ހިދުމަތް ހޯއްދުމަށް އަންނައިރު ސިއްހީ ފަރާތްތަކުން އިރުޝާދު ދެއްވާފައިވާ ގައިދުރުމިން ގެންގުޅެންވާނެ ކަަމަށެވެ. އަދި މިހާލަތުގެ ސަބަބުން އާންމު ރައްޔިތުންނަށް ދިމާވެފައިވާ ދަތިތަައް އިހުސާސްވާ ހިންދު ކެތްތެރިކަމަށް ޝުކުރުވެރިވާ ކަމަށްވެސް މިފްކޯއިން ބުނެއެވެ.

ކޮވިޑް-19 މާލެ ސިޓީގައި ފެތުރެމުންދާތީ އެކަން ކޮންޓްރޯލްކުރުމަށްޓަކައި މިސަރަހައްދު އޭޕްރީލް މަހުގެ 30 ވަނަ ދުވަހާ ހަމައަށް ވަނީ ލޮކްޑައުންކޮށްފަ އެވެ. އެއާއެކު ގިނަ ތަންތަނުން އަންނަނީ ބޭނުންވާ ތަކެތި ގޭގެއަށް ޑެލިވަރީ ކޮށްދެމުންނެވެ.