ކޮވިޑަށް ޝައްކު ކުރެވޭ މީހެއް ފެނުމާއި ގުޅިގެން ކ.ގުރައިދޫ ކަރަންޓީން ކޮށްފި
20 އެޕްރީލު 2020 | ހޯމަ 23:59ރަށުގައި މިވަގުތު ތިބި އެއްވެސް މީހެއް ރަށުން ފޭބުން ވަނީ މަނާކޮށްފަ
ކ. ގުރައިދޫ
ކޮވިޑް-19 އަށް ޝައްކު ކުރެވޭ އަލާމާތްތަކެއް ހުރި މީހެއް ފެނުމާއި ގުޅިގެން ކ. ގުރައިދޫ ކަރަންޓީނުކުރުމަށް އަންގައިފި އެވެ.
އެރަށް ކަރަންޓީނު ކޮށްފައިވާކަން އަންގާ މާލެ އަތޮޅު ގުރައިދޫ ކައުންސިލްގެ އިދާރާއަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ފޮނުވި ލިޔުމުގައި ވަނީ، އެރަށް ކަރަންޓީނުކުރެވުނީ ރަށުގައި މިވަގުތު ހުރި މީހެއްގެ ކިބައިން، ކޮވިޑް-19 އަށް ޝައްކު ކުރެވޭ އަލާމާތްތަކެއް ހުރި މީހެއް ފެނުމާއި ގުޅިގެން ސިއްޙީ ގޮތުން ބަލަން ޖެހޭ ކަންކަން ބެލުމަށް ކަމަށެވެ.
އެގޮތުން ރަށުގައި މިވަގުތު ތިބި އެއްވެސް މީހެއް އެޗްޕީއޭ އިން ވަކި ގޮތެއް ނިންމަންދެން ރަށުން ފޭބުމާއި، އެ އޭޖެންސީގެ ހުއްދަނެތި އެއްވެސް މީހަކު ރަށަށް އެރުން ވަނީ މަނާކޮށްފަ އެވެ.
ކ. ގުރައިދޫގެ އިތުރުން މިވަގުތު މޮނީޓަރިންގެ ހާލަތުގައި އޮތީ ހއ. މާރަންދޫ، ހދ. ނޮޅިވަރަމް، ހދ. ވައިކަރަދޫ، ހދ. ހިރިމަރަދޫ، ހއ. ހޯރަފުށި، ހއ. ތުރާކުނު، ހއ. އިހަވަންދޫ، ހއ. އުލިގަމް، ޖުވެލި މޯލްޑިވްސް ބޮޑު ފުށި ރިސޯޓު ކޮންސްޓްރަކްޝަން ސައިޓުގެ އިތުރުން މޯލްޑިވިއާނާ ސަފާރީ އެވެ. އަދި ގްރޭޓަރ މާލެ ސަރަހައްދު ވަނީ ލޮކްޑައުން ކުރެވިފަ އެވެ.
