ނޭޕާލާއި ބަންގްލަދޭޝްގައި ތިބި ދިވެހިން ރާއްޖެ ގެނެސްފި
20 އެޕްރީލު 2020 | ހޯމަ 14:01ނޭޕާލުން 18 ދިވެހިން އައިސްފައިވޭ
ނޭޕާލާއި ބަންގްލަދޭޝް އިން ރާއްޖެއައި ދިވެހިން އަދި ބަންގްލަދޭޝްގެ އަސްކަރިއްޔާ
ނޭޕާލް އަދި ބަންގްލަދޭޝްގައި ތިބި ދިވެހިން، ބަންގްލަދޭޝްގެ އަސްކަރިއްޔާގެ އެހީތެރިކަމާއެކު ރާއްޖެ އައިސްފިއެވެ.
ފޮރިން މިނިސްޓްރީން ބުނީ ބަންގްލަދޭޝްގެ ވެރިރަށް ޑާކާއިން ފުރައިގެން ރާއްޖެއަށް އައި އެގައުމުގެ އަސްކަރީ މަތިންދާބޯޓުގައި 71 ދިވެހިން އައިސްފައިވާކަމަށެވެ. އެއީ ނޭޕާލުން އައި 18 ދިވެހިންނާ، ބަންގްލަދޭޝްގެ އެކި ސިޓީތަކުން އައި 53 ދިވެހިން ކަމަށެވެ.
މީގެ ތެރޭގައި ތިބީ ސްޕެޝަލައިޒް ވުމަށް ގޮސްތިބި މެޑިކަލް ޑޮކްޓަރުންނާއި، މެޑިސިން ކިޔަވަމުންދާ ދަރިވަރުން ކަމަށް މިނިސްޓްރީން ބުންޏެވެ. އަދި އެދަރިވަރުން ރާއްޖެއަށް ނާދެވި ތާށިވެފައި ތިބީ ކޮވިޑް-19 އާ ގުޅިގެން އެޤައުމުތަކުގައި އަޅާފައިވާ ރައްކާތެރިކަމުގެ ފިޔަވަޅުތަކުގެ ސަބަބުން ރާއްޖެ އަންނާނެ އިތުރު މަގެއް ނެތުމާ ގުޅިގެން ކަމަށް މިނިސްޓްރީން މައުލޫމާތު ދެއެވެ.
ހޯމަ ދުވަހު އައި ފްލައިޓްގައި ދިވެހި ސަރުކާރުގެ އެދުމުގެ މަތިން ބަންގްލަދޭޝްގެ 10 މީހުންގެ މައްޗަށް އެކުލެވޭ މެޑިކަލް ޓީމެއް ވެސް ރާއްޖެ އައިސްފައިވާ ކަމަށް ފޮރިން މިނިސްޓްރީން ބުންޏެވެ.
ނެޝަނަލް އިމަރޖެންސީ އޮޕަރޭޝަން ސެންޓަރުގެ ތަރުޖަމާން މަބްރޫކް އަޒީޒް ވިދާޅުވީ ބަންގްލަދޭޝް އަދި ނޭޕާލުން އައި ކިޔަވާ ކުދިންގެ 14 ދުވަހުގެ ކަރަންޓީނު މުއްދަތު ފުރިހަމަ ކުރުމަށް ފަހު މެޑިކަލް ޓީމްތަކާއި ގުޅޭނެ ކަމަށެވެ.
