މިހާލަތުގައި މިސްކިތުގައި ތަރާވީސް ނަމާދު ނުކުރެވެނޭ
18 އެޕްރީލު 2020 | ހޮނިހިރު 19:33މިސްކިތްތަކުގައި ޖަމާއަތުގައި ނަމާދު ކުރުން ވަގުތީ ގޮތުން ހުއްޓާލީ ކޮވިޑް-19 ކޮންޓްރޯލް ކުރުމުގެ ގޮތުން
މާލޭ މިސްކިތްތަކުގައި ޖަމާއަތުގައި ނަމާދު ކުރަން ވަނީ ހުއްޓާލާފައި
ކޮވިޑް-19 ފެތުރޭ ހާލަތު މިހާރު މިއޮތް ގޮތަށް ދެމިގެންދާނަމަ މާލޭގެ މިސްކިތްތަކުގައި ތަރާވީސް ނަމާދު ނުކުރެވޭނެ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރް ވިދާޅުވެއްޖެއެވެ.
ހޮނިހިރު ދުވަހުގެރޭ ނެޝަނަލް އެމެޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރު ވިދާޅުވީ، އަތޮޅުތައް މިހާރު އޮތް ހާލަތުގައި އޮތްނަމަ ތަރާވީސް ނަމާދު މިސްކިތުގެ ޖަމާއަތުގައި ކުރެވޭނެ ކަމަށެވެ. ނަމަވެސް ރޯދަމަހާ ހަމަޔަށް މާލެ މިއޮތް ހާލަތު އޮވެއްޖެނަމަ ތަރާވީސް ނަމާދު ކުރަން ޖެހޭނީ ގޭގައި ކަމަށް ވިދާޅުވިއެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރެމުންދާތީ، މިހާލަތަށް ރިޔާއަތްކޮށް، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާ ރައްކާތެރިކަމުގެ މުހިއްމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި ދީނީ އިލްމުވެރިންގެ ލަފާގެ މަތިން މިދިޔަ މާރޗު މަހުގެ 18 ވަނަ ދުވަހުގެ މެންދުރު ނަމާދުން ފެށިގެން، މާލެ، ހުޅުމާލެ، ވިލިމާލެ، އަދި ސަރުކާރުން ފޭބުން މަނާކުރާ ހުރިހާ ރިސޯޓްތަކެއްގައި ފަރުޟު ނަމާދާއި ހުކުރު ނަމާދުގެ ޖަމާއަތް މިސްކިތުގައި ނުހެދުމަށް ނިންމާފައި ވެއެވެ.
އެގޮތުން މާލެ ސަރަހައްދާއި އަރާފޭބުން މަނާ ކޮށްފައިވާ ރިސޯޓުތަކުން ޖަމާތުގައި ނަމާދު ކުރުން ވަގުތީ ގޮތުން މެދުކަނޑާލާފައި އޮތްއޮތުން މިހާރު މާލެ ސަރަހައްދުގައި އިއުލާން ކޮށްފައިވާ ލޮކްޑައުން މުއްދަތު ނިމެންދެން މިސްކިތުގައި ޖަމާއަތުގައި ނަމާދު ކުރުން ވަގުތީގޮތުން ވަނީ މެދުކަނޑާލާފަ އެވެ.
ބަލި ކޮންޓްރޯލް ކުރުމުގެ ގޮތުން އައްޑޫ ސީޓީގެ އިތުރުން ފުވައްމުލަކު ސިޓީގައި ޖަމާއަތުގައި ނަމާދު ކުރުން ވަގުތީ ގޮތުން މެދުކަނޑާލަން އޭޕްރީލް 19 ވީ އާދިއްތަ ދުވަހު ވަނީ އަންގާފައެވެ.
