ގޭގެއަށް ކާޑު އުފުލުމުގައި ގައުމީ ފުޓްބޯޅަ ޓީމުގެ މިޑްފީލްޑަރު އިއްބެ

ހދ. ނޮޅިވަރަންފަރު ރައްޔިތުންނަށް އެހީވުމުގައި ގައުމީ ފުޓްބޯޅަ ޓީމުގެ މިޑްފީލްޑަރު އިބްރާހިމް ވަހީދު ހަސަން (އިއްބެ) ހަރަކާތްތެރިވާން ފަށައިފި އެވެ.

ރާއްޖޭގައި މިހާރު ފެތުރެމުންދާ ކޮރޯނާވައިރަސް (ކޮވިޑް-19) އާ ރާއްޖެއިން މީގެ ކުރިން ވަނީ 2019/2020 ވަނަ އަހަރުގެ ސީޒަނުގެ ބާކީބައި ކެންސަލް ކޮށްފައެވެ. އެގޮތުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ އެފްއޭ ކަޕާއި ޕްރެޒިޑެންޓްސް ކަޕް ކެންސަލްކޮށްފައެވެ. އެފްއޭ ކަޕް ކެންސަލްކުރީ ކުއާޓާ ފައިނަލް މެޗުތައް ކުޅުނު ފަހުންނެވެ.

އަދި ކޮވިޑް-19 އާ ގުޅިގެން އޭއެފްސީ ކަޕްގެ މެޗުތައް މުއްދަތެއް ނެތް ގޮތަށް ފަސްކުރަން އޭއެފްސީން ވަނީ ނިންމާފައެވެ. މިއަހަރުގެ އޭއެފްސީ ކަޕްގައި އިއްބެ ކުޅަމުން އަންނަ މާޒިޔާ ސްޕޯޓްސް އެންޑް ރެކްރިއޭޝަން ވާދަ ކުރަމުން އަންނައިރު، މީގެ ކުރިން އޭއެފްސީ ކަޕްގެ ގްރޫޕް ސްޓޭޖުގެ ފުރަތަމަ މެޗުގައި މާޒިޔާ ވަނީ މިދިޔަ މާޗު މަހު 12 ވަނަ ދުވަހު ވާދަކޮށްފަ އެވެ. އެ ދުވަހު އިންޑިއާގެ ޗެންނާއީގައި މާޒިޔާ ވަނީ އެ ގައުމުގެ ޗެންނާއީ ސިޓީއާ ދެކޮޅަށް ކުޅެފައެވެ.

ފުޓްބޯޅަ ސީޒަން ކެންސަލްކުރުމާއެކު އިއްބެ އޭނާގެ އަމިއްލަ ރަށަށް ދިޔައިރު، އެ ރަށުގެ ގޭގެއަށް ކާޑު އުފުލުމުގައި އިއްބެ ހަރަކާތްތެރިވާ ވީޑިއޯއެއް އަންނަނީ ސޯޝަލް މީޑިއާގައި ދައުރުވަމުންނެވެ.

ކޮވިޑް-19 އާ ގުޅިގެން ރާއްޖޭގެ އެއް ރަށުން އަނެއް ރަށަށް ދަތުރުކުރުން ހުކުރު ދުވަހުން ފެށިގެން ހުއްޓާލަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އަންގާފައިވީ ނަމަވެސް، ރަށްރަށަށް ބޭނުންވާ އަސާސީ މުދާ މާލެއިން ގެންދެވޭނެ އިންތިޒާމު ވަނީ ހަމަޖައްސާފައެވެ. އެއާއެކު ނޮޅިވަރަންފަރު ރައްޔިތުންގެ ގޭގެއަށް ބޭނުންވާ ކާޑުގެ ބާވަތްތައް އުފުލުމަށް ބަޔަކު ހޯދަން އިއުލާނުކުރުމާއެކު، އިއްބެ އަންނަނީ އެ މަސައްކަތުގައި ހަރަކާތްތެރި ވަމުންނެވެ.

ކޮވިޑް-19 އާ ގުޅިގެން ރާއްޖޭގައި ހަރުކަށި ފިޔަވަޅުތަކެއް އަޅާފައިވާއިރު، އެޗްޕީއޭއިން އަޅަން ނިންމި ފިޔަވަޅުތަކާއެކު ގާތް ގަނޑަކަށް މުޅި ރާއްޖެވަނީ ''ލޮކްޑައުން'' ކޮށްފައެވެ.

ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ އަދަދު 32 އަށް އަރާފައިވާއިރު، 16 މީހަކު މިހާތަނަށް ވަނީ މި ވައިރަހުން ރަނގަޅުވެފައެވެ.