ރަށްރަށަށް ދަތުރުކޮށްފައިވާ ފަރާތްތަކުން ކޮވިޑް-19 އަށް ޝައްކުވާ އަލާމަތެއް ފެނިއްޖެނަމަ ލަސްނުކޮށް ރިޕޯޓުކުރޭ: އެޗްޕީއޭ
މާލެއިންނާއި، ރިޒޯޓުތަކުންނާއި، ސަފާރީތަކުން ރަށްރަށަށް ދަތުރު ކޮށްފައިވާ ފަރާތްތަކުން އަލާމާތެއް ފެނިއްޖެނަމަ އެޗްޕީއޭއަށް ރިޕޯޓުކުުރުމަށް ވަނީ އަންގާފައި
ޑިރެކްޓަރ ޖެނެރަލް އޮފް ޕަބްލިކް ހެލްތު/ މައިމޫނާ އަބޫބަކުރު
ވޭތުވެދިޔަ ތަނުގައި މާލެއިންނާއި، ރިޒޯޓުތަކުންނާއި، ސަފާރީތަކުން ރަށްރަށަށް ދަތުރު ކޮށްފައިވާ ފަރާތްތަކުން ކޮވިޑް-19 އަށް ޝައްކުވާ އަލާމަތެއް ފެނިއްޖެނަމަ، ލަސްނުކޮށް، އެޗްޕީއޭ އަށް އެންގުމަށް އެދިއްޖެއެވެ.
އެޗްޕިއޭއިން މިފަދައިން ގޮވާލާފައިވަނީ ކޮވިޑް-19 ފެތުރުން ކޮންޓްރޯލް ކުރުމަށް ޓަކައި މާލެ ޞަރައްޙަދު ފިޔަވައި ރާއްޖޭގެ ހުރިހައި ރަށެއްގައި ޚާއްޞަ ފިޔަވަޅުތައް އެޅުމަށް ޑިރެކްޓަރ ޖެނެރަލް އޮފް ޕަބްލިކް ހެލްތު އެންގެވި އިޢުލާނުގައެވެ. އާންމު ޞިއްޙަތު ރައްކާތެރި ކުރުމުގެ ޤާނޫނުގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތައް ލިބިގެންވާ ބާރުގެ ދަށުން މާލެ ޞަރަހައްދު ފިޔަވައި ރާއްޖޭގެ ހުރިހައި ޞަރަހަދެއްގައި މިއަދު ހަވީރު 06:00 އިން ފެށިގެން ޚާއްޞަ ފިޔަވަޅުތައް އަޅަން ނިންމާ ކަމާއި ގުޅޭ އިދާރާތަކައް ވަނީ މިކަން ތަންފީޒުކުރަން އަންގަވާފައެވެ.
ރިސޯޓުތަކާއި ސަފާރީތައް ބަންދުކޮށްފައި އޮތުމަށްފަހު ވަކި އުޞޫލެއްގެ ދަށުން މިހާރު މުވައްޒަފުން ފޭބުމުގެ ހުއްދަ ދިނުމާއެކު، ބައެއް މުވައްޒަފުންނާއި ފަޅުވެރިން ވަނީ ރަށްރަށަށް ފުރައިގެން ގޮސްފައެވެ. އަދި ސަރުކާރު ބަންދުކޮށް ސްކޫލްތަކާއި ކޮލެޖް ޔުނިވަރސިޓީތައް ބަންދުވުމާއި ގުޅިގެން މާލޭގައި ދިރިއުޅޭ ގިނަ ބަޔަކު ވަނީ އަތޮޅުތެރެއަށް ފުރައިގެން ގޮސްފައެވެ. މިގޮތައް ދަތުރުކޮށްފައިވާ އެއްވެސް މީހެއްގެ ހަށިގަނޑުން ކޮވިޑް-19 އަށް ޝައްކުވާ އަލާމާތެއް ފެނިއްޖެނަމަ، ލަސްނުކޮށް ހެލްތު ޕްރޮޓެކްޝަން އޭޖެންސީއަށް އެންގުމަށް އެއިދާރާއިން ވަނީ އެދިފައެވެ.
މާލެއިން މިދިޔަ އަންގާރަ ދުވަހު ދިވެއްސަކު ވައިރަސްއަށް ޕޮޒިޓިވްވުމާއި ގުޅިގެން އެޗްޕީއޭއިބް ދަނީ ފުޅާ ދާއިރާއެއްގައި "ކޮންޓެކްޓް ޓްރޭސިންގ" ގެ މަސައްކަތްކުރަމުންނެވެ. އަދި އަތޮޅުތެރޭގައި ކޮމިއުނިޓީ ސްޕްރެޑަކަށް ނުދާނެފަދަ ފިޔަވަޅުތައް އެއިދާރާއިން ދަނީ އަޅަމުންނެވެ. މިކަމުގައި އާންމު ރައްޔިތުންގެ އެއްބާރުލުން އެއިދާރާއަށް ބޭނުންވެއެވެ. އެގޮތުން މިއަދު ހަވީރު 6 އިން ފެށިގެން ޒަރޫރީ ބޭނުމެއްގައި ނޫނީ އެއްރަށުން އަނެއް ރަށަށް ދަތުރު ނުކުރެވޭ ގޮތައް ވަނީ އަންގާފައެވެ.
