ޗެމްޕިއަންސް ލީގުގެ ފައިނަލް މެޗު އޮގަސްޓް 29 އަށް ތާވަލުކުރަނީ
މީގެ ކުރިން ޔުއެފާއިން ވަނީ ޗެމްޕިއަންސް ލީގާއި ޔޫރޮޕާ ލީގުގެ ކުޅުން މުއްދަތެއް ނެތް ގޮތަށް ފަސްކޮށްފައި
މިދިޔަ އަހަރުގެ ޔުއެފާ ޗެމްޕިއަންސް ލީގުގެ ތަށި އުފުލާލި ލިވަޕޫލް
ޔުއެފާ ޗެމްޕިއަންސް ލީގުގެ ފައިނަލް މެޗު އޮގަސްޓް މަހުގެ 29 އަށް ތާވަލުކުރަން މަސައްކަތް ކުރަމުންދާ ކަމަށް ރިޕޯޓުތައް ބުނެފި އެވެ.
މުޅި ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އާ ގުޅިގެން، ޔުއެފާއިން މީގެ ކުރިން ވަނީ ޗެމްޕިއަންސް ލީގާއި ޔޫރޮޕާ ލީގުގެ ކުޅުން މުއްދަތެއް ނެތް ގޮތަށް ފަސްކޮށްފައެވެ.
ރިޕޯޓުތައް ބުނާ ގޮތުން މެދު ކަނޑާލާފައިވާ ފުޓްބޯޅަ ސީޒަނާ މެދު ގޮތެއް ނިންމުމަށް މި މަހުގެ 23 ވަނަ ދުވަހު މެމްބަރު ގައުމުތަކާއެކު ޔުއެފާއިން ބައްދަލުކުރާނެ އެވެ.
އެގޮތުން ކުރިޔާލާ މިފަހަރުގެ ފުޓްބޯޅަ ސީޒަން ނިންމާލުމަށް މި ބައްދަލުވުމުގައި މަޝްވަރާ ކުރާނެ އެވެ. މީގެ ކުރިން ޔުއެފާއިން ވަނީ ޔުއެފާގެ ހުއްދަ ނުހޯދައި ލީގުތައް ކެންސަލް ނުކުރަން އަންގާފައެވެ. އެކަމަކު ދާދި ފަހުން ބެލްޖިއަމުން ވަނީ ބެލްޖިއަމް ޕްރޯ ލީގު ކެންސަލްކޮށް އެއްވަނައިގައި އޮތް ކްލަބު ބްރޫޖަށް ތަށި ދޭން ނިންމައިފަ އެވެ.
މީގެ އިތުރުން މި ބައްދަލުވުގައި ޔުއެފާ ޗެމްޕިއަންސް ލީގުގެ ފައިނަލް މެޗު އޮގަސްޓް މަހުގެ 29 އަށް ތާވަލުކުރަންވެސް މަޝްވަރާ ކުރާނެ ކަމަށް ރިޕޯޓުތައް ބުނެއެވެ. މީގެ ކުރިން ޗެމްޕިއަންސް ލީގުގެ ފައިނަލް މެޗު ކުޅުމަށް ތާވަލުކޮށްފައި އޮތީ މެއި މަހުގެ 30 ވަނަ ދުވަހު ތުރުކީގެ އިސްތަންބޫލް ގައެވެ.
ރިޕޯޓުތައް ބުނާ ގޮތުން ޗެމްޕިއަންސް ލީގުގެ ފައިނަލް މެޗު އޮގަސްޓް މަހުގެ 29 އަށް ތާވަލުކުރާއިރު، ޔޫރޮޕާ ލީގުގެ ފައިނަލް މެޗު ތާވަލުކުރާނީ އޮގަސްޓް މަހުގެ 26 އަށެވެ.
ޗެމްޕިއަންސް ލީގާއި ޔޫރޮޕާ ލީގާ ގުޅޭ ގޮތުން މަޝްވަރާ ކުރަން ޔުއެފާއިން ނިންމާފައިވާއިރު، މި ދެ މުބާރާތް އަލުން ފަށަން ހާލަތެއް ނުލިބި ގިނަ ދުވަސްތަކެއް ވެއްޖެނަމަ، ދެ މުބާރާތް ކެންސަލްކުރަން ވެސް ޖެހިދާނެ ކަމަށް ޔުއެފާ އިން މީގެ ކުރިން ވަނީ ބުނެފައެވެ.
ޗެމްޕިއަންސް ލީގާއި ޔޫރޮޕާ ލީގުގެ ނޮކައުޓް މެޗުތައް ފަށާފައިވަނިކޮށް ހުއްޓާލަން ޖެހުނީ ޔޫރަޕްގައި ކޮވިޑް-19ގެ ނުރައްކާ ބޮޑުވުމުންނެވެ. އެންމެ ފުރަތަމަ ޖޫން މަހުގެ ނިޔަލަށް މި ދެ މުބާރާތް ނިންމަން ތާވަލުކުރި ނަމަވެސް ފަހުން ވަނީ ހާލަތު ރަނގަޅުވަންދެން މުއްދަތެއް ނެތް ގޮތަށް މުބާރާތް ފަސްކޮށްފަ އެވެ. ޔޫރަޕްގެ ގިނަ ގައުމުތަކުގެ ފުޓްބޯޅަ ސީޒަން ވެސް ހުއްޓިފައިވާއިރު، ކުރިއަށް އޮތްތަނުގައި އަމަލުކުރާނެ ގޮތެއް ކަނޑައެޅުމަށްވެސް ޔުއެފާ އިން އަންނަނީ ގައުމުތަކާ އެކު މަޝްވަރާކުރަމުންނެވެ.
