ވީހާވެސް ކުނި މަދު ކުރޭ: ވެމްކޯ
16 އެޕްރީލު 2020 | ބުރާސްފަތި 09:47ގެއަށްވަންނަ ކުދި ގޯޅިތަކުން ވެސް ބޭރަށް ކުނި ނެރެފައި ބެހެއްޓުމަށް ވެމްކޯއިން އެދޭ
ވެމްކޯގެ މުވައްޒަފުން ކުނި ނެގުމުގެ މަސައްކަތްކަތުގައި
ކުނި އުފައްދާ މިންވަރު ވީހާވެސް މަދު ކުރުމަށާއި، މާލެ ސަރަހައްދުގެ ގޭބީސީތަކުގައި އުފެދޭ ކުނި މެންދުރު 12 އާއި 2 އާ ދެމެދު ގޭގެ ތިރިއަށް ބޭލުމަށް ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އިން އެދެފިއެވެ.
ނޭޝަނަލް އެމަޖެންސީ އޮޕަރޭޝަން ސެންޓަރުގައި ބުރާސްފަތި ދުވަހުގެ މެންދުރު ވެމްކޯއިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވެމްކޯގެ މެނޭޖިންގ ޑިރެކްޓަރ އާދަމް މުހައްމަދު ވިދާޅުވީ ކޮވިޑް-19 އާ ގުޅިގެން މާލެ ސަރަހައްދު ލޮކްޑައުން ކޮށްފައިވާތީ، މާލެ، ހުޅުމާލެ އަދި ވިލިމާލޭގެ ގޭގައި އުފެދޭ އާންމުކުނި ފިޔަވައި، ކުނީގެ ގޮތުގައި އުކާލެވޭ އެހެނިހެން ސާމާނު އުކާލުން މިވަގުތަށް މަޑުޖައްސާލާފައިވާ ކަމަށެވެ.
އެހެންކަމުން މާލެ ސަރައްހަދު އާންމު ހާލަތަކަށް ބަދަލުވުމުން، އަލުން ކުރިން ދެމުންދިޔަ ހިދްމަތްތައް ލިބެމުންދާނެ ކަމަށެވެ. އެގޮތުން އުކާލެވޭ ގޮނޑި މޭޒު ނުވަތަ ފަރުނީޗަރުފަދަ ހިފާ ގެންގުޅޭ ސާމާނު މިވަގުތު ގޭގައި ބެހެއްޓުމަށް ވެމްކޯއިން ވަނީ އެދިފައެވެ.
އެކުންފުނީގެ އޮޕަރޭޝަންސް މެނޭޖަރ މުހައްމަދު ޝާން ވިދާޅުވީ، ގޭގެގައި އުކާލާ ކުނި ރަނގަޅަށް ބަންދުކުރުމަށް ފަހު ކޮންމެ ދުވަހެއްގެވެސް މެންދުރު 12:00 އާ 2:00 އާ ދެމެދު ގޭގެ ތިރިއަށް ބޭލުމަށް އެދޭކަމަށެވެ.
ވެކްމޯއިން ބުނީ ކޮމާޝަލް (ވިޔަފާރީގެ އުސޫލުން) ކަސްޓަމަރުންނަށް ހިދުމަތް ދޭނީ ހެނދުނު 9:00 ން މެންދުރު 1:00 ށް ކަމަށެވެ.
ވެމްކޯއިން ބުނީ، ކަރަންޓީން ނުވަތަ މޮނީޓަރިންގ ހާލަތުގައި ހުންނަ ގޭގެއިން ކުނި ބޭރަށް ނުނެރުމަށާއި އެކަމަށް ހާއްސަ ޓީމަކުން ގޮސް އެފަދަ ގޭގެއިން ކުނި ނަގާނެ ކަމަށެވެ.
ކުނި ބަންދު ކުރާއިރު، ލީކުނުވާގޮތަށް އެ ކޮތަޅަކަށް އެކަށީގެންވާ ވަރަށް ކުނި އެޅުމަށާއި އަދި ޑަބަލް ކޮތަޅަށްލުމަށްފަހު، ރަނގަޅަށް ބަންދު ކުރުމަށްވެސް ޝާން ވަނީ އެދިލައްވާފައެވެ.
ވެމްކޯ އިން ބުނީ އެކުންފުނީގެ ކޯލް ސެންޓަރު (1666)ގެ ހިދުމަތް ހެނދުނު 10 ން ހަވީރު 4 އާ ހަމައަށް ލިބެމުންދާނެ ކަމަށެވެ.
