ވެމްކޯގެ ހުރިހާ ހިދުމަތެއް ވަގުތީ ގޮތުން މެދުކަނޑާލައިފި
15 އެޕްރީލު 2020 | ބުދަ 13:28ކުނި ނެގުން ހުއްޓާލާފައިވަނީ މާލޭގެ ލޮކްޑައުންގެ މުއްދަތު ނިމެންދެން
ވެމްކޯއިން މާލޭގެ ގެތަކުން ކުނި ނަގަމުންދަނީ
ކޮވިޑް-19 އަށް ޕޮޒިޓިވްވި މީހަކު މާލެއިން ފެނުމާއި ގުޅިގެން އަޅާފައިވާ ފިޔަވަޅުތަކާއި ގުޅިގެން ވެމްކޯގެ ހުރިހާ ހިދުމަތެއް ވަގުތީގޮތުން މެދުކަނޑާލައިފިއެވެ.
ވެމްކޯއިން ނެރުނު ނޫސްބަޔާނެގައި ބުނެފައިވަނީ އެޗްޕީއޭ އަދި ނެޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ)ގެ ލަފާގެ މަތިން މިކަމުގައި ރައްކާތެރިވުމަށް އެޅޭ ފިޔަވަޅެއްގެ ގޮތުން، އެ ކޯޕަރޭޝަނުން ފުރަމާލެ ސަރަހައްދުގައި ފޯރުކޮށްދެމުންދާ އެންމެހައި ޚިދުމަތްތައް ލޮކްޑައުން މުއްދަތުގައި ވަގުތީ ގޮތުން މެދުކަނޑާލުމަށް އަންގާފައިވާތީ އެ ކޯޕަރޭޝަނުގެ ޚިދުމަތްތައް މެދުކަނޑާލެވިފައިވާ ކަމަށެވެ.
ވެމްކޯއިން ވަނީ ޚިދުމަތްތައް ހުއްޓާލެވިފައިވާ މިދަނޑިވަޅުގައި، ގޭބިސީތަކުންނާއި ވިޔަފާރިތަކުން އުފެދޭ ކުނި މަދުކުރުމަށް ޙާއްސަ ސަމާލުކަމެއް ދިނުމަށާއި، އަދި އުފެދޭ ކުނި އެންމެ އެކަށީގެންވާ ގޮތުގައި (ދެކޮތަޅަށްލުމަށްފަހު) ރަނގަޅަށް ބަންދުކުރުމަށް އިލްތިމާސްކޮށްފައިވެއެވެ.
އަދި ހާލަތަށް ރިޢާޔަތްކޮށް، ކަމާބެހޭ އިދާރާތަކުގެ ލަފަޔާއެކު ކޯޕަރޭޝަނުގެ މެދުކެނޑިފައިވާ ޚިދުމަތްތަކަށް އަންނަ ބަދަލުތައް ކަސްޓަމަރުންނާއި ހިއްސާކުރެވެމުންދާނެ ކަމަށާއި، މިގެނެވުނު ބަދަލުގެ ސަބަބުން ކަސްޓަމަރުންނަށް ދިމާވެދާނެ ދަތިތަކަށް ވެމްކޯއިން ވަނީ މައާފަށް އެދިފައެވެ.
