ބައެއް މުވައްޒަފުން ނޯޕޭ ލީވްއަށް ފޮނުވާލަން ނިންމި ނިންމުން ބޯންމަތުން ބަދަލުކޮށްފި އެވެ.
ދުނިޔޭގައި މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ދިމާވާ މާލީ ގޮންޖެހުންތަކުން އަރައިގަތުމަށް ބޯންމަތުން މީގެ ކުރިން ވަނީ އެ ކްލަބުގެ ބައެއް މުވައްޒަފުން ނޯޕޭ ލީވްއަށް ފޮނުވާލާފައެވެ. ޕްރިމިއާ ލީގުގެ ބައެއް ކްލަބުތަކުން، އެ ކްލަބުތަކުގެ މުވައްޒަފުން ނޯޕޭއަށް ފޮނުވާލުމުން ގިނަ ބަޔަކު ވަނީ އެކަމަށް ފާޑު ކިޔާފައެވެ.
އިނގިރޭސިވިލާތުގައި ނޯޕޭއަށް ފޮނުވާލާ މުވައްޒަފުންނަށް ސަރުކާރުން ކަނޑައަޅާފައިވާ ސްކީމްގެ ދަށުން އެމީހެއްގެ މުސާރައިގެ 80 އިންސައްތަ ލިބެއެވެ.
އަންގާރަ ދުވަހު ބޯންމަތުން ނެރުނު ބަޔާނެއްގައި ބުނެފައިވަނީ ކްލަބުގެ ސަޕޯޓަރުންގެ އަޑުއަހައި، މުވައްޒަފުން ނޯޕޭއަށް ފޮނުވާލަން ނިންމި ނިންމުން މިހާރު ބަދަލުކޮށްފައިވާ ކަމަށެވެ.
މީގެ ކުރިން ބޯންމަތުގެ ކޯޗު އެޑީ ހައު ވަނީ އޭނާގެ މުސާރަ ކުޑަކުރަން އަމިއްލައަށް ނިންމާފައެވެ. މިއީ ޕްރިމިއާ ލީގުގެ ކޯޗަކު މުސާރަ ކުޑަކުރި ފުރަތަމަ ފަހަރެވެ. މީގެ އިތުރުން ބޯންމަތުގެ އެސިސްޓަންޓް ކޯޗު ޖޭސަން ޓިންޑޯލް އާއި، ޗީފް އެގްޒެކެޓިވް ނީލް ބްލޭކް އާއި، ޓެކްނިކަލް ޑިރެކްޓަރު ރިޗަޑް ހިއުސްވެސް ވަނީ މުސާރަ ކުޑަކުރަން ނިންމާފައެވެ.
ބޯންމަތުގެ ނިންމުން ބަދަލުކުރިއިރު، ލީގުގެ އެއްވަނައިގައި އޮތް ލިވަޕޫލާއި ޓޮޓެންހަމުން މީގެ ކުރިން ވަނީ މުވައްޒަފުން ނޯޕޭއަށް ފޮނުވުމަށް ނިންމި ނިންމުން ބަދަލުކޮށްފައެވެ. އެ ދެ ކްލަބުންވެސް އެ ނިންމުން ބަދަލުކުރީ ސަޕޯޓަރުންގެ ފަޑުކިޔުމާ ގުޅިގެންނެވެ.
މިހާރު އިނގިރޭސި ޕްރިމިއާ ލީގުގައި ވާދަކުރަމުން އަންނަ ކްލަބުތަކުގެ ތެރެއިން ބައެއް މުވައްޒަފުން ނޯޕޭއަށް ފޮނުވާލަން ނިންމާފައި ވަނީ ނިއުކާސަލް ޔުނައިޓެޑާއި ނޯވިޗް ސިޓީން އެކަންޏެވެ.
