ޔޫއޭއީގައި ދިރިއުޅޭ ދިވެހިންނަށް ކެއަރ ޕެކެޖްތައް ފޮނުވަން ސަރުކާރުން ހުޅުވާލައިފިއެވެ.

ފޮރިންގ މިނިސްޓްރީން ބުނީ ކޮވިޑް-19 އާއި ގުޅިގެން ޔޫއޭއީގައި ދިރިއުޅޭ ދިވެހިންގެ ޒަރޫރީ ބޭނުންތަކަށް ބޭނުންވާ ބައެއް ތަކެތި ހޯދުމަށް ދަތިތަކެއް ކުރިމަތިވެފައިވާ ކަމަށެވެ. މިފަދަ ފަރާތްތަކަށް ސަރުކާރުން އެހީތެރިކަން ފޯރުކޮށްދިނުމުގެ ގޮތުން 17 އޭޕްރީލް 2020 ވާ ހުކުރު ދުވަހު، މޯލްޑިވިއަން އިން ޔޫއޭއީއަށް ދަތުރުކުރުމަށް ހަމަޖެހިފައިވާ ކާގޯ ފްލައިޓްގައި ދިވެހި ޢާއިލާތަކުން ފޮނުވަން ބޭނުންވާ ތަކެތި ހިލޭ، ފޮނުވައި ދިނުމުގެ އިންތިޒާމް ހަމަޖައްސައި ދިނުމަށް ސަރުކާރުން ނިންމާފައިވާ ކަމަށް މިނިސްޓްރީން ބުނެއެވެ.

ފޮރިންގ މިނިސްޓްރީން ބުނީ ޔޫއޭއީގައި ދިރިއުޅޭ ދިވެހިންނަށް ތަކެތި ފޮނުވުމަށް ބޭނުންވާ ފަރާތްތަކުން، އުޞޫލާއި އެއްގޮތަށް މިނިސްޓްރީގެ ވެބްސައިޓް މެދުވެރިކޮށް ފޯރމް ހުށަހެޅުމަށް ފުރުޞަތު ހުޅުވާލާ ކަމަށެވެ.

ފޮރިން މިނިސްޓްރީން ބުނީ ތަކެތި ބަލައިގަތުމަށް ހަމަޖެހިފައިވަނީ ވެލާނާ އިންޓަރނޭޝަނަލް އެއަރޕޯޓުގެ ޑިޕާރޗަރ ހޯލް ކައިރީގައި ބެހެއްޓިފައިވާ ޚާއްޞަ ކައުންޓަރު ތަކުން، 16 އެޕްރީލް 2020 ވާ ބުރާސްފަތި ދުވަހުގެ ހެނދުނު 09:00 އިން މެންދުރު 15:00 އަށެވެ.

މީގެކުރިން ވަނީ ސްރީ ލަންކާ، އިންޑިއާ، މެލޭޝިޔާ އަދި ބެންކޮކްގައި ދިރިއުޅޭ ދިވެހިންނަށް ވެސް ކެއަރ ޕެކޭޖް ފޮނުވުމުގެ އިންތިޒާމުތައް ސަރުކާރުން ހަމަޖައްސައިދީފައެވެ.