ކޮލެޖް ތަކާއި ޔުނިވަރސިޓީތައް ހުޅުވުމާއި ގުޅޭގޮތުން ޓެކްނިކަލް އެޑްވައިޒަރީ ގްރޫޕާއެކު އަންގާރަ ދުވަހު މަޝްވަރާކުރައްވާނެ ކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވެއްޖެ އެވެ.
ހޯމަ ދުވަހުގެ ރޭ ރާއްޖެ ޓީވީ ގެ "ފަލަ ސުރުޚީ" ޕްރޮގުރާމުގައި ވާހަކަ ދައްކަވަމުން ޑރ އިބްރާހިމް ހަސަން ވިދާޅުވީ އެ ބައްދަލުވުމަށް ވަޑައިގެންނެވުމުގެ ކުރިން ސަރުކާރާއި އަދި ޕްރައިވެޓް ކޮލެޖްތަކާއެކު ފޯނުން މަޝްވަރާކުރައްވާ އެބޭފުޅުންގެ ޚިޔާލު ހޯއްދަވާނެ ކަމަށެވެ.
އިބްރާހިމް ހަސަން ވިދާޅުވީ ކޮލެޖް ތަކާއި ޔުނިވަރސިޓީތައް ބަންދު ކުރެއްވުން އެއީ އެބޭފުޅުންގެ އަމިއްލަ ނިންމެވުމެއް ނޫން ކަމަށާއި، އެއީ ކޮވިޑް-19 ފެތުރުން ކޮންޓްރޯލް ކުރުމަށްޓަކައި ޑައިރެކްޓަރު ޖެނެރަލް އޮފް ޕަބްލިކް ހެލްތުން ނިންމަވާފައިވާ ނިންމެވުމެއް ކަމަށެވެ.
އަދި އެފިޔަވަޅު އަޅުއްވާފައިވަނީ ރައްޔިތުންގެ ސަލާމަތާއި ރައްކާތެރިކަމަށް ޓަކައި ކަމަށް އެނާ ފާހަގަ ކުރެއްވިއެވެ. އަންގާރަ ދުވަހު ބާއްވާ މަޝްވަރާތަކަށް ފަހު ކޮލެޖް ޔުނިވަރސިޓީތައް ހުޅުވާނީތޯ ނުވަތަ ނޫންތޯ ގޮތެއް ނިންމާނީ އެޗްޕީއޭއިން ކަމަށް ޑރ އިބްރާހިމް ޙަސަން ވިދާޅުވިއެވެ.
ރާއްޖޭގައި ހިންގާ ޔުނިވަރސިޓީތަކާއި ކޮލެޖުތަކާއި އަދި ތަމްރީނުދޭ ހުރިހާ މަރުކަޒުތައް ބަންދުކުރުމަށް އެޗްޕީއޭއިން އަންގާފައިވަނީ މިދިޔަ މާރޗް މަހުގެ 14 ވަނަ ދުވަހުއެވެ.
