ތ. ދިޔަމިގިލީގައި ދަނޑުވެރިކަން ކުރުމަށް ކުޔަށް ދޫކޮށްފައިވާ ބިންތަކުގެ ކުލިން 40 އިންސައްތަ އުނިކުރަން ނިންމައިފިއެވެ.

ދިޔަމިގިލީ ކައުންސިލުން ބުނީ ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮވިޑް-19 ރޯގާއާއި ގުޅިގެން ރާއްޖޭގެ އިގްތިސާދަށް ނޭދެވޭ އަސަރުތަކެއް ކުރަން ފަށާފައިވާ ކަމަށެވެ.

ކައުންސިލުން ބުނީ މިކަމުން ދިޔަމިގިލީގެ ރައްޔިތުންނަށް ލުޔެއް ހޯދައިދިނުމުގެ ގޮތުން ކައުންސިލުން ދޫކޮށްފައިވާ ކުލީ ބިންތަކަށް ދައްކަންޖެހޭ ކުލީގެ ތެރެއިން 2020 ވަނަ އަހަރުގެ އޭޕްރިލް މަހުން ފެށިގެން ޖޫން މަހުގެ ނިޔަލަށް ބިމުކުލީގެ %40 (ސާޅިސް އިންސައްތަ) އުނިކުރުމަށް ނިންމާފައިވާ ކަމަށެވެ.

މިނިންމުން ނިންމީ ކައުންސިލުގެ 3 ވަނަ ދަޢުރުގެ 2020 ވަނަ އަހަރުގެ 15 ވަނަ ޢާއްމު ޖަލްސާއިން ކަމަށް ވެސް ކައުންސިލުން ބުނެއެވެ.

ކޮވިޑް-19އާ ގުޅިގެން ރާއްޖޭގެ ދަނޑުވެރިކަން ކުރިއެރުމަށް ފިޝަރީޒް މިނިސްޓްރީން ދަނޑުވެރިކަން ކުރިއެރުވުމަށް ވެސް ދަނީ ގިނަ މަސައްކަތައް ކުރަމުންނެވެ. އަދި ކުރިއަށް އޮތްތާގައި ދަނޑުވެރިން އުފައްދާ ބާވަތައް މާކެޓް ކުރެވޭނެ ނިޒާމެއް ގާއިމްކުރުމުގެ މަސައްކަތްތައް ކުރަމުންދާ ކަމަށް މިނިސްޓްރީން ބުނެއެވެ.