ކޮވިޑް-19: ފޮރިން މިނިސްޓަރ ޝާހިދު ޔޫއޭއީގެ ފޮރިން މިނިސްޓަރާ ފޯނުން ގުޅުއްވައި މަޝްވަރާކުރައްވައިފި
12 އެޕްރީލު 2020 | އާދީއްތަ 03:39ކޮވިޑް-19ގެ ބަލިމަޑުކަމާ ބެހޭ ގޮތުން މަޝްވަރާކުރެއްވި
މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދު
މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދު، ޔޫއޭއީގެ ފޮރިން މިނިސްޓަރ ޝައިޚް ޢަބްދުﷲ ބިން ޒައިދް އަލްނަޙްޔާން އާ ފޯނުން ގުޅުއްވައި، ދުނިޔެއަށް ކުރިމަތިވެފައިވާ ކޮވިޑް-19ގެ ބަލިމަޑުކަމާ ބެހޭ ގޮތުން މަޝްވަރާކުރައްވައިފިއެވެ.
މި ފޯން ކޯލްގައި ދެޤައުމަށް ކޮވިޑް-19ގެ ސަބަބުން ދިމާވެފައިވާ ގޮންޖެހުންތަކާ ބެހޭ ގޮތުންނާއި، ބަލި އިތުރަށް ފެތުރުނަ ނުދިނުމަށް ކުރެވޭ މަސައްކަތްތަކާ ބެހޭގޮތުން ދެ ވަޒީރުން މަޝްވަރާކުރައްވާފައިވާ ކަމަށް ފޮރިން މިނިސްޓްރީން މަޢުލޫމާތުދެއެވެ.
ފޮރިން މިނިސްޓްރީން ބުނީ، ކޮވިޑް-19ގެ ސަބަބުން ދިމާވާ އިޤުތިޞާދީ ގެއްލުންތައް ކުޑަކުރުމަށް ދެޤައުމު ގުޅިގެން ކުރެވިދާނެ މަސައްކަތްތަކާ ބެހޭ ގޮތުންވެސް ދެވަޒީރުން މަޝްވަރާކުރައްވާފައިވާ ކަމަށެވެ.
މިނިސްޓަރ ޝާހިދުގެ ވާހަކަފުޅުގައި ކޮވިޑް-19 އިން ރައްކާތެރިވުމަށް ޔޫއޭއީއިން އަޅަމުންދާ ފިޔަވަޅުތަކަށް ތަޢުރީފުކުރެއްވިއެވެ. ޚާއްޞަކޮށް ގިނަ ބަޔަކު ޓެސްޓްކުރެވޭނެ އިންތިޒާމު ހަމަޖެހިފައިވުމުން ބަލި ފެތުރޭ މިންވަރު ކޮންޓްރޯލް ކުރެވިފައިވާކަން މިނިސްޓަރ ޝާހިދުގެ ވާހަކަފުޅުގައި ފާހަގަކުރެއްވިއެވެ.
