ކުއްޔަކާއި ނުލައި ދަނޑުވެރިކަމަށް 3 އަހަރު ދުވަހުގެ މުއްދަތަށް ބިން ދޫކުރަން ފަށައިފި
3 އަހަރުގެ މުއްދަތަށް ބިން ދޫކުރުމަށް ވަނީ ހަމަޖެހިފައި
މީހުންތަކެއް ގަހެއް އިންދަނީ
ބިން އޮތް ރަށްރަށުން އެ ރަށުގެ ކައުންސިލްތަކާއި ގުޅިގެން 3 އަހަރު ދުވަހުގެ މުއްދަތަށް ބިން ދޫކުރުމަށް ނިންމާފައިވާކަމަށް މިނިސްޓަރ އޮފް ފިޝަރީޒް އެގްރިކަލްޗަރ އެންޑް މެރިން ރިސޯސަސް ޒަހާ ވަހީދު ވިދާޅުވެއްޖެއެވެ.
ކޮވިޑް-19 އާއި ގުޅޭ އެންމެ ފަހުގެ މައުލޫމާތު ދިނުމަށް ދަރުބާރުގޭގައި ގާއިމްކޮށްފައިވާ ނޭޝަނަލް އެމެޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރ ޒަހާ ވިދާޅުވީ ދަނޑު ބިން ދޫކުރުމުގެ މަސައްކަތް އެ ރަށްތަކުގެ ކައުންސިލާއި ޕްލޭނިންގް މިނިސްޓްރީ އާއި ގުޅިގެން ކުރަމުން އަންނަ ކަމަށާއި ބިން ދޫކުރުމަށް ހަމަޖެހިފައިވަނީ 3 އަހަރުގެ މުއްދަތަކަށް އެއްވެސް ކުއްޔަކާނުލައި ކަމަށެވެ.
އިތުރަށް ތަފްސީލުކޮށްދެއްވަމުން މިނިސްޓަރ ޒަހާ ވިދާޅުވީ، ދޫކުރެވޭ ބިންތަކުގައި ކުރަނީ ކޮން މަސައްކަތެއްކަން ގަވާއިދުން މޮނިޓަރ ކުރަމުންދާނެ ކަމަށާއި ދަނޑު ބިން ދޫކުރުމުގައި ޕްލޭނިންގް މިނިސްޓްރީގެ ލޭންޑް ޔޫސްޕްލޭންއާ އެއްގޮތަށް ކައުންސިލްތަކާއި ބިން ހަވާލުކުރާ ފަރާތްތަކާއި މެދު އެއްބަސްވުމެއް ހެދޭނެ ކަމަށެވެ. ނޫސްވެރިންގެ ބައްދަލުވުމުގައި މިނިސްޓަރ ވަނީ، މޭ މަހުން ފެށިގެން ދަނޑުވެރިން ހައްދާ ތަކެތި ސަރުކާރުން ގަންނާނެ ކަމަށް ވިދާޅުވެފައެވެ. އަދި މިހާރުވެސް އެސްޓީއޯއާއެކު ބައެއް ދަނޑުވެރިން މަސައްކަތްކުރާ ކަމަށް ވަނީ ފާހަގަކުރައްވާފައެވެ. މީގެއިތުރުން، ބައެއް ރަށްރަށުގެ އިހުތިސޯސްގެ ތެރެއަށް ވަދެފައިވާ ފަޅު ރަށްރަށުގައި ދަނޑުވެރިކަން ކުރަން އެދޭނަމަ އެ ފުރުސަތު ފޯރުކޮށްދިނުމުގެ މަސައްކަތް ކުރާނެ ކަމަށް މިނިސްޓަރ ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން، އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވީ ދަނޑުވެރިކަމުގެ އިޤުތިސޯދެއް 44 ރަށެއްގައި ސަރުކާރުން ފާހަގަކޮށްފައިވާ ކަމަށާއި ދަނޑުވެރިކަމުގެ އުފެއްދުންތައް ސަރުކާރުން ގަންނާނެ ކަމަށެވެ.
