ކެނީ ޑަލްގްލިޝް ކޮރޯނާވައިރަހަށް ޕޮޒިޓިވްވެއްޖެ

ލިވަޕޫލްގެ ކުރީގެ ފޯވާޑް އަދި އެޓީމުގެ ކުރީގެ ކޯޗު ސާ ކެނީ ޑަލްގްލިޝް ކޮރޯނާވައިރަސް (ކޮވިޑް-19) އަށް ޕޮޒިޓިވްވެއްޖެ އެވެ.

ޑަލްގްލިޝް ކޮވިޑް-19 އަށް ޕޮޒިޓިވްވިކަން އޭނާގެ އާއިލާއިން ވަނީ ކަށަވަރުކޮށްދީފައެވެ. ރިޕޯޓުތައް ބުނާ ގޮތުން އޭނާ ވަނީ މިދިޔަ ބުދަ ދުވަހު ހޮސްޕިޓަލްގައި އެޑްމިޓްކޮށްފައެވެ.

އުމުރުން 69 އަހަރުގެ ޑަލްގްލިޝްގެ އާއިލާއިން ބުނީ އޭނާ ކޮވިޑް-19 އަށް ޕޮޒިޓިވްވި ނަމަވެސް، އަދި މިހާތަނަށް އޭނާގެ ހަށިގަނޑުން އެއްވެސް އަލާމާތެއް ފެނިފައިނުވާ ކަމަށެވެ. އަދި ޑަލްގްލިޝްގެ ހާލު ރަނގަޅު ކަމަށްވެސް ވަނީ ބުނެފައެވެ.

ސްކޮޓްލެންޑަށް އުފަން ޑަލްގްލިޝް ވަނީ 1977 އިން 1990 އަށް ލިވަޕޫލަށް ކުޅެފައެވެ. އޭގެ ކުރިން ސެލްޓިކަށްވެސް ކުޅުނު ޑަލްގްލިޝް ވަނީ ލިވަޕޫލަށް ކުޅެދިން 355 މެޗުގައި 118 ލަނޑު ޖަހާފައެވެ. އަދި އޭނާ ވަނީ ލިވަޕޫލާއެކު އިނގިރޭސި ލީގު ހަ ފަހަރު އަދި ޔޫރަޕިއަން ކަޕް އެއް ފަހަރު ހޯދާފައެވެ. އަދި ޑަލްގްލިޝް ވަނީ 1983 ވަނަ އަހަރުގެ ބަލޮންޑޯ އެވޯޑުގެ ދެވަނަ ހޯދާފައެވެ.

ސްކޮޓްލެންޑުގެ ގައުމީ ޓީމަށް 102 މެޗު ކުޅެދީފައިވާ ޑަލްގްލިޝް ލިވަޕޫލަށް އެންމެ ފުރަތަމަ ކޯޗުކަން ކޮށްދިނީ 1985 އިން 1991 ވަނަ އަހަރުގެ ނިޔަލަށެވެ. މި މުއްދަތުގައި އޭނާ ލިވަޕޫލަށް އިރުޝާދު ދީފައިވަނީ ޓީމުގެ ކުޅުންތެރިއެއްގެ ދައުރުވެސް އަދާކުރަމުންނެވެ. އޭގެ ފަހުން ޑަލްގްލިޝް ވަނީ 2011 އިން 2012 އަށް ލިވަޕޫލަށް އިރުޝާދު ދީފައެވެ.

ލިވަޕޫލްގެ ކުރީގެ ފޯވާޑް ޑަލްގްލިޝް ކޮވިޑް-19 އަށް ޕޮޒިޓިވްވިއިރު، އާސެނަލްގެ ކޯޗު މިކޭލް އާޓެޓާ އާއި، އެސްޓަން ވިލާގެ ގޯލްކީޕަރު ޕެޕޭ ރެއިނާ އަދި ޗެލްސީގެ ފޯވާޑް ކަލުމް ހަޑްސަން-އޮޑޯއި މީގެ ކުރިން ވަނީ ކޮވިޑް-19 އަށް ޕޮޒިޓިވްވެފައެވެ. މީގެ ތެރެއިން ކަލުމް ހަޑްސަން-އޮޑޯއި މިހާރު ވަނީ ވައިރަހުން ސަލާމަތްވެފައެވެ.