ވެލެންސިއާ ސްކޮޑުގެ 35 އިންސައްތަ ކޮރޯނާވައިރަހަށް ޕޮޒިޓިވްވެއްޖެ
17 މާރިޗު 2020 | އަންގާރަ 09:20އެޓީމުގެ ކުޅުންތެރިންގެ އިތުރަށް ބައެއް ސްޓާފުންވެސް ވަނީ މި ވައިރަހަށް ޕޮޒޓިވްވެފައި
ވެލެންސިއާ ކުޅުންތެރިން
މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އަށް ވެލެންސިއާ ސްކޮޑުގެ 35 އިންސައްތަ ޕޮޒިޓިވްވެއްޖެ އެވެ.
ވެލެންސިއާ އިން ވަނީ ޔުއެފާ ޗެމްޕިއަންސް ލީގުގައި އިޓަލީގެ އެޓަލާންޓާއާ ދެކޮޅަށް މިދިޔަ މަހުގެ 20 ދުވަހު ކުޅެން އިޓަލީގެ މިލާނަށް ދަތުރުކޮށްފައެވެ. އޭގެ ފަހުން މި މަހުގެ 11 ވަނަ ދުވަހު އެޓަލާންޓާ އިން ވަނީ ވެލެންސިއާއާ ދެކޮޅަށް ކުޅެން އެ ގައުމަށް ގޮސްފައެވެ.
އޭގެ ފަހުން އެޓަލާންޓާ ސްކޮޑުވެސް މިހާރު ވަނީ ކަރަންޓީނުކޮށްފައެވެ. ވެލެންސިއާގެ ސްކޮޑުގެ 35 އިންސައްތަ މި ވައިރަހަށް ޕޮޒިޓިވްވިއިރު، އެ ހުރިހާ ކުޅުންތެރިންނެއްގެ ނަންތައް އަދި މިހާތަނަށް ހާމަކޮށްފައެއް ނުވެއެވެ. އެކަމަކު އެޓީމުގެ ހޯސޭ ގާޔާ އާއި އެޒެކިއުލް ގަރާއީ އަދި އެލިއަކުއިން މަންގާލާ މި ވައިރަހަށް ޕޮޒޓިވްވެފައިވާ ކަމަށް މީގެ ކުރިން ވަނީ ރިޕޯޓުކޮށްފައެވެ. އެޓީމުގެ ކުޅުންތެރިންގެ އިތުރަށް ބައެއް ސްޓާފުންވެސް މި ވައިރަހަށް ޕޮޒިޓިވްވެފައިވާ ކަމަށް އެ ކްލަބުން ވަނީ ބުނެފައެވެ.
ވެލެންސިއާ ސްކޮޑުގެ 35 އިންސައްތަ ކޮރޯނާވައިރަސް (ކޮވިޑް-19) އަށް ޕޮޒިޓިވްވިއިރު، ސްޕެނިޝް ލީގުގެ މެޗުތައް މިހާރު ވަނީ މެދުކަނޑާލާފައެވެ. ސްޕެނިޝް ލީގު މެދުކަނޑާލިއިރު، ރެއާލް މެޑްރިޑްގެ ބާސްކެޓްބޯޅަ ކުޅުންތެރިއަކު ކޮރޯނާވައިރަސް (ކޮވިޑް-19) އަށް ޕޮޒިޓިވްވުމުން، ރެއާލްގެ ފުޓްބޯޅަ ޓީމުވެސް މިހާރު ވަނީ ކަރަންޓީނު ކޮށްފައެވެ.
ސްޕެއިނުން މިހާތަނަށް 9،942 މީހުން ކޮރޯނާވައިރަހަށް ޕޮޒިޓިވް ވެފައިވާއިރު، 342 މީހުން ވަނީ މިބަލީގައި މިހާތަނަށް މަރުވެފައެވެ.
ވެލެންސިއާގެ ސްކޮޑުގެ އިތުރުން އިޓާލިއަން ލީގުގެ ގިނަ ކުޅުންތެރިންތަކެއްވެސް މިހާރު ވަނީ މި ވައިރަހަށް ޕޮޒިޓިވްވެފައެވެ. އިންގްލެންޑުން މިހާތަނަށް މި ވައިރަސް ޖެހިފައިވަނީ އާސެނަލްގެ ކޯޗު މިކޭލް އާޓެޓާ އާއި ޗެލްސީގެ ޒުވާން ފޯވާޑް ކަލުމް ހަޑްސަން-އޮޑޯއި އަށެވެ.
