ދުނިޔޭގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ކްލަބުތަކަށް މާލީ ގޮތުން ދިމާވާނެ ދަތިތަކުން އަރައިގަތުމަށް އިނގިރޭސި ޕްރިމިއާ ލީގު ކްލަބުތަކަށް ޓީވީ ފީގެ ގޮތުގައި އެއް މިލިއަން ޕައުންޑްގެ އެޑްވާންސް ޕޭމެންޓްއެއް ދޭން ނިންމައިފިއެވެ.

މީޑިއާ ރިޕޯޓުތައް ބުނާ ގޮތުން މި ސީޒަނުގައި ކްލަބްތަކަށް ކުރިޔަށް ހުރި މެޗުތަކަށް ބަލައި ޓީވީ ރައިޓްސް ވިއްކައި އެއް މިލިއަން ޕައުންޑުގެ ފައިސާ ހޯދުމުގެ ހުއްދަ ޕްރިމިއާ ލީގުން ދޭން ނިންމީ ކްލަބުތަކަށް މިހާރު ދިމާވެފައިވާ މާލީ ހާލަތުން އަރައިގަތުމަށް އެހީވުމުގެ ގޮތުންނެވެ. މީގެ އިތުރުން އަންނަ ސީޒަނަށް ތައްޔާރުވުމަށް ވެސް ކްލަބުތަކަށް މާލީ ގޮތުން އެހީވުމަށް ޕްރިމިއާ ލީގުން ނިންމައިފައިވާ ކަމަށް މީޑިއާ ރިޕޯޓުތައް ބުނެއެވެ.

މީޑިއާ ރިޕޯޓުތައް ބުނާ ގޮތުން މި ސީޒަނުގައި ކުރިޔަށް ހުރި މެޗުތައް ކުރިޔަށް ނުގެންދެވިއްޖެ ޕްރިމިއާ ލީގަށް 762 މިލިއަން ޔޫރޯގެ ގެއްލުން ވާނެއެވެ. ޕްރިމިއާ ލީގުގެ ޓީވީ ރައިޓްސް ވިއްކައިގެން އަންނަނީ ބޮޑު ފައިދާ އެއް ނަގަމުންނެވެ.

ޕްރިމިއާ ލީގު ކްލަބުތަކަށް މާލީ ގޮތުން ގޮންޖެހުންތަކާ ކުރިމަތިލާން ޖެހުނު ނަމަވެސް، ޕްރިމިއާ ލީގުގެ ކުޅުންތެރިން އަންނަނީ ކޮވިޑް-19 އާ ދެކޮޅަށް އިނގިރޭސިވިލާތުގައި މަސައްކަތް ކުރާ ނެޝަނަލް ހެލްތު ސާވިސަސް އަށް އެހީވަމުންނެވެ. އެގޮތުން އިނގިރޭސި ޕްރިމިއާ ލީގުގެ ކުޅުންތެރިން ވަނީ "ކުޅުންތެރިން އެކުގައި" މި ނަމުގައި ކެމްޕޭނެއް ތާރަފުކޮށްފައެވެ.

އިނގިރޭސިވިލާތުން މިހާތަނަށް 60،000 އަށްވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވާއިރު، ޕްރިމިއާ ލީގު ކުޅުންތެރިންގެ މި ކެމްޕޭން މެދުވެރިކޮށް ކޮވިޑް-19 އާ ދެކޮޅަށް ކުރީ ސަފުގައި މަސައްކަތް ކުރަމުން އަންނަ ފަރާތްތަކަށް އެހީވުމަށް ވަނީ ނިންމާފައެވެ.

ކޮވިޑް-19 އާ ގުޅިގެން މުއްދަތެއް ނެތް ގޮތަށް ޕްރިމިއާ ލީގުގެ ކުޅުން މެދުކަނޑާލާފައިވާއިރު، ޕްރިމިއާ ލީގުގެ ކްލަބުތަކުން މީގެ ކުރިން ވަނީ ނެޝަނަލް ހެލްތު ސާވިސަސް އަށް 20 މިލިއަން ޔޫރޯ ހަދިޔާ ކުރުމަށް ނިންމާފައެވެ.

އަދި ކްލަބުތަކަށް ދިމާވެފައިވާ މާލީ ގޮންޖެހުންތަކުން އަރައިގަތުމަށް، ޕްރިމިއާ ލީގުގެ ކުޅުންތެރިންގެ މުސާރައިން ވަރަށް އަވަހަށް 30 އިންސައްތަ އުނިކުރާނެ ކަމަށް ރިޕޯޓުތައް ބުނެއެވެ. މިހާތަނަށް ޕްރިމިއާ ލީގުން ކުޅުންތެރިންގެ މުސާރަ ކުޑަކުރަން ނިންމާފައިވަނީ ސައުތެމްޓަނުން އެކަންޏެވެ.