ކޮވިޑް-19 އިން ރާއްޖެ ސަލާމަތްވުމުގެ އުއްމީދު ބޮޑު: މިނިސްޓަރ އަމީން
8 އެޕްރީލު 2020 | ބުދަ 02:481800 ޓެސްޓު ވަނީ ކޮށްފައި
ހެލްތް މިނިސްޓަރު އަބްދުﷲ އަމީން
ދުނިޔެގޭ އަންދާޒާތަކާއި ހިލާފަށް ކޮވިޑް-19 އިން ރާއްޖެ ސަލާމަތްވުމުގެ އުއްމީދު ބޮޑުކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެއެވެ.
ދުނިޔޭގެ ސިއްހަތު ދުވަހާގެ މުނާސަބަތުގައި ދެއްވި ހިތޯބުގައި މިނިސްޓަރު އަމީން ވިދާޅުވީ، ކޮވިޑް-19 އާ ގުޅިގެން ސަރުކާރުން އަޅަމުންގެންދާ ފިޔަވަޅުތަކުގެ އަމާޒު ހިފާފައިވަނީ، ރާއްޖެއަށް ނުރައްކަލެއް އަތުވެއްޖެ ހިނދެއްގައި އެކަމުން އާބާދީ ސަލާމާތް ކުރުން ކަމަށެވެ. އެގޮތުން ސަރުކާރުން އެކުލަވާލާފައިވާ ޓާސްކްފޯސް އިން ރެއާ ދުވާލު މަސައްކަތް ކުރަމުންދަނީ މުޅި އާބާދީގެ ރައްކަލަކަށް ކަމަށްޓަކައި ވިދާޅުވިއެވެ.
އަމީން ވިދާޅުވި ގޮތުގައި ސިއްހީ ހިދުމަތްތެރިންނާއި، ފުލުުހުންގެ އިތުރުން ސިފައިން ކުރާ މަސައްކަތުގެ ނަތިއްޖާ ފެނިގެންދާނީ އެ ފަރާތްތަކުން ދެމުންގެންދާ އިރުޝާދުތަކާއި ނަސޭހަތް ގަބޫލުކޮށް އާއްމުން ގޭގައި މަޑުކޮށްގެން ތިބުމުންނެވެ. ރާއްޖެއިން ކޮވިޑް-19 އާ ދެކޮޅަށްކުރާ މަސައްކަތުގެ ނަތިއްޖާ އަކީ ރައްޔިތުންގެ ބުރަ މަސައްކަތްކަން ފާހަގަކުރައްވަމުން މިނިސްޓަރު ވިދާޅުވީ، މި ބަލިން ރާއްޖެ ސަލާމަތްވުމުގެ އުއްމީދު ބޮޑު ކަމަށެވެ.
އަމީން ވިދާޅުވީ، ރާއްޖޭގައި މިހާތަނަށް ކޮވިޑް-19 އަށް 1800 މީހަކު ޓެސްޓުކޮށް، 1700 އަށްވުރެ ގިނަ މީހަކު އެކަހެރިކުރެވިފައިވާ ކަމަށެވެ. ކޮވިޑް-19 އާ ދެކޮޅަށް ރާއްޖެއިން ކުރަމުންދާ މަސައްކަތުގެ ނަތިއްޖާ ހާސިލްކުރަން އަދި ދުވަސްތަކެއް ނަގާނެ ކަމަށް އަމީން ފާހަގަކުރެއްވިއެވެ.
