މާނޭ ގަތުމަށް ރެއާލުން ތައްޔާރުވަނީ

ލިވަޕޫލްގެ ސެނެގާލް ފޯވާޑް ސަޑިއޯ މާނޭ ގަތުމަށް ރެއާލް މެޑްރިޑުން ތައްޔާރުވަމުން އަންނަ ކަމަށް މީޑިއާ ރިޕޯޓުތައް ބުނެފިއެވެ.

މީޑިއާ ރިޕޯޓުތައް ބުނާގޮތުން މާނޭ ގަތުމަށް ރެއާލުން ތައްޔާރުވަމުން އަންނަނީ ރެއާލްގެ ކޯޗު ޒިނެދިން ޒިދާންގެ އެދުމުގެ މަތިންނެވެ. އަދި މި ސީޒަނަށްފަހު ލިވަޕޫލް ދޫކޮށްލުމަށް މާނޭވެސް ބޭނުންވާ ކަމަށް ރިޕޯޓުތައް ބުނެއެވެ.

މާނޭގެ އިތުރުން ލިވަޕޫލްގެ މިސްރުގެ ފޯވާޑް މުހައްމަދު ސަލާހް ގަތުމަށްވެސް ރެއާލުން އަންނަނީ ތައްޔާރުވަމުންނެވެ. މީޑިއާ ރިޕޯޓުތައް ބުނާގޮތުން މި ސީޒަނަށްފަހު ސަލާހްވެސް ލިވަޕޫލު ދޫކޮށްދާނެއެވެ.

ފްރާންސްގެ ކުރީގެ މިޑްފިލްޑަރު މުހައްމަދު ސިސޯކޯ ބުނީ ސަލާހު އަށް ވުރެ މާނޭ ގަތުމަށް ރެއާލުން މަސައްކަތް ކުރާނެ ކަމަށާއި މާނޭގެ ކުޅުމާއި މެދު ރެއާލްގެ ކޯޗު ޒިދާން ހިތްހަމަޖެހޭ ކަމަށެވެ.

ސަލާހް އަދި މާނޭ ލިވަޕޫލު ދޫކޮށްދިޔަ ނަމަވެސް އޭނާ ކުޅޭ މަގާމު ފޫބައްދާނެ ކުޅުންތެރިން ލިވަޕޫލުގައި ތިބޭނެ ކަމަށްވެސް ސިސޯކޯ ބުންޏެވެ.

ސައުތެމްޕްޓަނުން 2016 ވަނަ އަހަރު ލިވަޕޫލަށް ބަދަލުވުމަށްފަހު މާނޭ އަންނަނީ އެޓީމުގައި ތަފާތު ދައްކަމުންނެވެ. އެގޮތުން މާނޭ ވަނީ މިހާތަނަށް ލިވަޕޫލަށް ކުޅެދިން 118 މެޗުގައި 59 ލަނޑު އެޓީމަށް ކާމިޔާބުކޮށްދީފައެވެ.