ކޮވިޑް-19: ވައިރަސް ޖެހިގެން ސޫރިޔާގައި ފުރަތަމަ މަރު
29 މާރިޗު 2020 | އާދީއްތަ 15:42ވައިރަސްގައި މަރުވީ އުމުރުމް ދުވަސްވީ އަންހެނެއް
ވައިރަސްއަށް ސްކްރީން ކުރަނީ
ނޮވެލް ކޮރޯނާވައިރަސް(ކޮވިޑް-19) ގައި ސޫރިޔާއިން ފުރަތަމަ ފަހަރަށް މީހަކު މަރުވިކަން ރިޕޯޓުކޮށްފިއެވެ.
ސޫރިޔާގެ ދައުލަތުގެ މީީޑިއާއިން ޚަބަރު ފަތުރާގޮތުގައި މިއަދު އެޤައުމުން ކޮވިޑް-19 އަށް ފަރުވާދެމުން ދަނިކޮށް މަރުވެފައިވަނީ، އުމުރުން ދުވަސްވީ އަންހެނެކެވެ. އޭނާ އެމަރޖެންސީ ޙާލަތުގައި ޑޮކްޓަރަށް ދެއްކީވެސް މިއަދު ކަމަށް ސޫރިޔާގެ ހެލްތު މިނިސްޓްރީން ބުނެއެވެ.
ސޫރިޔާއިން ކޮވިޑް-19 ފެނުމާއެކު ވައިރަސް ކޮންޓްރޯލް ކުރުމަށް އެޅި ފިޔަވަޅެއްގެ ގޮތުން މިމަހުގެ 25 ވަނަ ދުވަހު ވަނި މުޅި ޤައުމުގައި ކާރފިއު އިއުލާންކޮށްފައެވެ. މިހާތަނަށް އައިއިރު ސޫރިޔާއިން ވައިރަސްއަށް ޕޮޒިޓިވްވެފައިވަނީ އެންމެ ފަސް މީހުންނެވެ. ދާޚިލީ ހަނގުރާމައިގެ ސަބަބުން ސުންނާފަތިވެފައިވާ ސޫރިޔާގައި މި ވައިރަސް ކޮންޓްރޯލް ނުކުރެއްވިއްޖެނަމަ، އޭގެ ނޭދެވޭ އަސަރު އެޤައުމުގެ ބޮޑު އާބާދީއަކަށް ކުރާނެއެވެ. ސަބަބަކީ އެޤައުމުގެ ބޮޑުބައެއްގައި ގިނަ ބަޔަކު އަސާސީ ޚިދުމަތްތަކުން މަހްރޫމުވެ އަމިއްލަ ވަޒަނުގައި ރެފިއުޖީންނަށް ވެފައިވާތިއެވެ.
