ކޮވިޑް-19: ވައިރަސް ޖެހޭ މީހުންގެ އަދަދު އިތުރުވަމުންދާ ވަރަކަށް އެކަމަށް އޮތީ ތައްޔާރަށްކަމަށް އިންޑިޔާ އިން ބުނެފި

ކޮވިޑް-19 ޖެހޭ މީހުންގެ އަދަދު އިތުރުވަމުންދާވަރަކަށް އެކަމަށް އިންޑިޔާގެ ސަރުކާރު އޮތީ ތައްޔާރަށްކަމަށް ދިއްލީގެ ޗީފް މިނިސްޓަރ އަރްވިންދް ކެޖްރިވާލް ވިދާޅުވެއްޖެ އެވެ.

ނޫސްވެރިންގެ ބައްދަލުވުމެއްގައި ވާހަކަދައްކަވަމުން ކެޖްރިވާލް ވިދާޅުވީ ދުވާލަކު އަލަށް 100 މީހުންނަށް ވައިރަސް ޖެހުނުކަމުގައިވީ ނަމަވެސް އެކަމަށް ދިއްލީގެ ސަރުކާރު އޮތީ ތައްޔާރަށްކަމަށެވެ. އެގޮތުން ވައިރަސްޖެހޭ މީހުންގެ އަދަދު އިތުރުވަމުންދާނަމަ ކަންތައްކުރާނެ ގޮތުގެ ޕްލޭނެއް އެކުލަވާލަމުންދާކަމަށް ކެޖްރިވާލް ވިދާޅުވި އެވެ.

މީގެއިތުރުން ސަރުކާރުން އަންނަނީ އެގައުމުގެ ފަގީރުންނަށް ޚާއްސަކޮށް އެހީތެރިކަން ފޯރުކޮށްދިނުމުގެ ކަންތައްތަކެއް ކުރަމުންކަމަށް ކެޖްރިވާލް ވިދާޅުވި އެވެ. އެގޮތުން ފަގީރުންނަށް ޚާއްސަކޮށް މެންދުރުގެ ކެއުމާއި ރޭގަނޑުގެ ކެއުން ދިނުމަށް މަސައްކަތްކުރަމުންދާ ކަމަށް ކެޖްރިވާލް ވިދާޅުވި އެވެ. ކޮންމެދުވަހަކު މަދުވެގެން 2000 ފަގީރުންނަށް ކާންދިނުމަށް މަސައްކަތްކުރައްވަމުން ގެންދަވާކަމަށް ކެޖްރިވާލް ވިދާޅުވި އެވެ.

މިހާތަނަށް އާއިރު ދިއްލީން 39 މީހަކަށް ވައިރަސް ޖެހިފައިވާއިރު 29 މީހުންނަކީ ދިއްލިއަށް އެތެރެވި މީހުންނެވެ. އަދި 10 މީހަކު ވަނީ ކަރަންޓީނު ކުރެވިފަ އެވެ.