ޔުނައިޓެޑްގެ އެއްބަސްވުން މަޓިޗް އާކޮށްފި

ސާބިއާގެ މިޑްފީލްޑަރު ނަމަންޏާ މަޓިޗްގެ އެއްބަސްވުން މެންޗެސްޓާ ޔުނައިޓެޑުން އާކޮށްފި އެވެ.

މީގެ ކުރިން ޔުނައިޓެޑާއެކު މަޓިޗް ހަދާފައިވާ އެއްބަސްވުން މި ސީޒަން ނިމުމުން ހަމަވަން އޮތްއިރު، އަލަށް ހެދި އެއްބަސްވުމާއެކު އަންނަ އަހަރުގެ ހޫނު މޫސުމުގެ ނިޔަލަށް އޭނާ ޔުނައިޓެޑުގައި މަޑުކުރާނެ އެވެ.

އެއް އަހަރުގެ މުއްދަތަކަށް މަޓިޗްގެ އެއްބަސްވުން ޔުނައިޓެޑުން އާކުރިއިރު، ރިޕޯޓުތައް ބުނާގޮތުން އެޓީމުން އަންނަނީ މަޓިޗްގެ އެއްބަސްވުން ދިގު މުއްދަތަކަށް އާކުރުމަށްވެސް މަސައްކަތް ކުރަމުންނެވެ.

މީގެކުރިން ޗެލްސީ އަދި ބެންފީކާ އަށްވެސް ކުޅެފައިވާ މަޓިޗް ޔުނައިޓެޑަށް ބަދަލުވީ 2017 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެ ކްލަބަށް ކުޅުނު 109 މެޗުގައި 4 ލަނޑު ކާމިޔާބުކޮށްފައެވެ.

ޗެލްސީއާއެކު ދެ އިނގިރޭސި ޕްރިމިއާ ލީގު ކާމިޔާބުކޮށްފައިވާ މަޓިޗް ވަނީ އެ ކްލަބާއެކު އެފްއޭ ކަޕް އެއް ފަހަރު ކާމިޔާބުކޮށްފައެވެ. ބެންފީކާއާއެކު މަޓިޗް ތިން ސީޒަން ހޭދަކޮށްފައިވާއިރު، އޭނާ ވަނީ އެ ކްލަބާއެކު ލީގު ކާމިޔާބުކޮށްފައެވެ.