ސައިބަރ ސޭފްޓީ-ބެލެނިވެރިންގެ އަތްމަތީ ފޮތް ނެރެފި
16 މާރިޗު 2020 | ހޯމަ 09:57މިފޮތުން އިންޓަރނެޓުން ކުރިމަތިވެދާނެ ނުރައްކާތަކަށް ބެލެނިވެރިން އަހުލުވެރިކުރުވޭނެ
ސައިބަރ ސޭފްޓީ-ބެލެނިވެރިންގެ އަތްމަތީ ފޮތް ނެރެދެއްވަނީ
ބެލެނިވެރިންނަށް ޚާއްސަ ސައިބަރ ސޭފްޓީ-ބެލެނިވެރިންގެ އަތްމަތީ ފޮތް ނެރެފިއެވެ.
ހޯމަ ދުވަހު އެޑިޔުކޭޝަން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި މިފޮތް ނެރެދެއްވީ މިނިސްޓަރު ޑރ.އައިޝަތު އަލީ އަދި ކޮމިޝަނަރ އޮފް ޕޮލިސް މުހައްމަދު ހަމީދެވެ.
މިއަތް މަތީ ފޮތާ ބެހޭ ގޮތުން މިނިސްޓަރު އައިޝަތު ވިދާޅުވީ މިއަތްމަތީ ފޮތަކީ އިންޓަރނެޓާއި މީސްމީޑިއާގެ ތަފާތު ވަސީލަތްތަކުން ކުރިމަތިވެދާނެ ނުރައްކާތަކަށް ބެލެނިވެރިން އަހުލުވެރިކުރުވުމަށާއި، ރައްކާތެރި ގޮތުގައި އިންޓަރނެޓް ބޭނުންކުރުމަށް ދަރިވަރުން ހޭލުންތެރިކޮށްދޭނެ ގޮތްތައް ބެލެނިވެރިންނަށް އޮޅުންފިލުވައިދިނުމުގެ މަގުސަދުގައި މިނިސްޓްރީން އެކުލަވާލި ފޮތެއް ކަމަށެވެ.
މިނިސްޓަރު ވިދާޅުވީ ކޮވިޑް-19 އާއި ގުޅިގެން ސްކޫލުތަށް ބަންދު ކުރުމުން ދަރިވަރުންގެ އުނގެނުމުގެ ކަންތައްތައް ރާވާފައިމިވަނީ އިންޓަނެޓް މެދުވެރިކޮށް އުނގެނޭގޮތަށް ކަމަށްވާތީ، އިންޓަނެޓް ބޭނުންކުރުމުގައި ދަރިވަރުންގެ ސަލާމަތާއި ރައްކާތެރިކަން ކަށަވަރު ކުރުމަކީ ވަރަށް ބޮޑު ޒިންމާއެއްކަމަށެވެ.
ކޮމިޝަނަރ ޕޮލިސް ހަމީދު ވިދާޅުވީ މުޖުތަމައުގެ ރައްކާތެރިކަމަށްޓަކައި ކުރަންޖެހޭ މަސައްކަތްތައް އަބަދުވެސް ފުލުހުން ކުރަމުންދާ ކަމަށެވެ. އެގޮތުން މިފަދަ ފިޔަވަޅުތައް އެޅުމަކީ ފުލުހުންގެ ސްޓްރެޓެޖިކް ޕްލޭންގައި ހިމެނޭ ކަމެއް ކަމަށް ހަމީދު ވިދާޅުވިއެވެ.
ކޮމިޝަނަރ ހަމީދު ވިދާޅުވީ އިންޓަރނެޓާއި މީސްމީޑިއާގެ ތަފާތު ވަސީލަތްތަކުގެ ސަބަބުން ދިމާވާ މައްސަލަތައް ރިޕޯޓުކުރާ މިންވަރު އިތުރު ކަމަށާއި، ދަރިވަރުން އޮންލައިންވެގެން އުޅޭއިރު، އެކުދިން ހޭލުންތެރިކޮށް ބެލެނިވެރިން ރައްކާތެރި ފިޔަވަޅު އެޅުމަކީ މުހިންމު ކަމަށެއް ކަމަށެވެ.
