ރައްޔިތުންގެ މަޖިލީހުގެ ޚަރަދުތަކުން 19.3 މިލިއަން ރުފިޔާ ކުޑަކުުރުމަށް ފިނޭންސް މިނިސްޓާރ އެދިވަޑައިގެންފައިވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.

ހޯމަ ދުވަހުގެ ޖަލްސާގައި މަޖިލީހުގެ ރައީސް ވިދާޅުވީ އެކަމަށް އެދި ފިނޭންސް މިނިސްޓަރ މަޖިލީހަށް ސިޓީ އެއް ފޮނުވާފައިވާކަމަށެވެ. އަދި މިކަމަކީ ނުކުރެވޭނެކަމެއް ނޫންކަމަށް ރައީސް ނަޝީދު ވިދާޅުވި އެވެ.

ރައީސް ނަޝީދު ވިދާޅުވީ މަޖިލީހުގެ ހަރަދުތަކުން 19.3 މިލިއަން ރުފިޔާ އުނިކޮށް ދެވޭނެ ކަމަށް ގަބޫލުފުޅު ކުރައްވާ ކަމަށެވެ. އަދި މަޖިލީހުގެ މިހާރުގެ އެކައުންޓުތައް ބައްލަވައިގެން އެ އަދަދަށް ފައިސާ އުނި ކުރެވޭނެ ބައިތައް ހޯއްދަވައި ދެއްވުމަށް މަޖިލީހުގެ ނައިބު ރައީސް އީވާ އަބްދުﷲ ގެ އަރިހު އެދިވަޑައިގެންފައިވާ ކަމަށް ރައީސް ނަޝީދު ވިދާޅުވި އެވެ. މީގެ އިތުރުން މުޅި އަހަރުގެ ބަޖެޓުގެ ތެރެއިން 19.3 މިލިއަން ރުފިޔާ ކުޑަކޮށް ދެވިދާނެ ކަމަށް ވެސް މިނިސްޓަރު އެދިވަޑައިގެންފައިވާތީ ކުރިއަށް އޮތް ތަނުގައި އެ ހަރަދު ކުޑަކޮށްފައި މިނިސްޓްރީއަށް ދެވޭނެ ގޮތް ވެސް ހަމަޖެއްސޭނެ ކަމަށް އެމަނިފާނު ވިދާޅުވި އެވެ.

މިއަހަރަށް ރައްޔިތުންގެ މަޖިލީހުން ފާސްކޮށްފައިވާ ބަޖެޓްގައި ރައްޔިތުންގެ މަޖިލީހުގެ އިދާރާއަށް ކަނޑައަޅާފައިވަނީ 129،550،285 މިލިއަން ރުފިޔާ އެވެ.

ކޮވިޑް-19 އިން އަންނަ ދަތިކަމުން އަރައިގަތުމަށް ސަރުކާރުން އަންނަނީ ތަފާތު ފިޔަވަޅުތައް އަޅަމުންނެވެ. އެގޮތުން ހަރަދުތައް ކުޑަކޮށްގެން ބަޖެޓުން އެއް ބިލިއަން ރުފިޔާ ސަލާމަތް ކުރަން ސަރުކާރުން ވަނީ މީގެކުރިން ނިންމައިފައެވެ.

މީގެއިތުރުން ކޮވިޑް-19 އާ ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާންކޮށްފައިވާއިރު އެކަމާ ގުޅިގެން 212 މިލިއަން ރުފިޔާގެ ކޮންޓިންޖެންސީ ބަޖެޓެއް ފިނޭންސް މިނިސްޓްރީން ވަނީ ކަނޑައަޅައިފައެވެ.

ކޮވިޑް-19 ރާއްޖެއިން ފެނުމާއި ގުޅިގެން ގައުމާ މުހާތަބު ކުރައްވައި ރައީސް އިބްރާހިމް މުހައްމަދު ސޯލިހް ވިދާޅުވެފައިވަނީ ވައިރަހާ ގުޅިގެން އިގްތިސޯދަށް ވަރަށް ބޮޑު ހީނަރުކަމެެއް އަންނާނެ ކަމަށެވެ. އެގޮތުން ލިބޭ އާމްދަނީ 6.9 ބިލިއަނެއްހާ ރުފިޔާ މަދުވާނެ ކަމަށް ރައީސް ވިދާޅުވިއެވެ. އަދި ޖީޑީޕީ ކުރިއަރާ މިންވަރު ހުންނާނީ، 0.5 ޕަސެންޓާއި މައިނަސް 5.6 ޕަސަންޓާ ދެމެދުގެ މިންވަރެއްގައި ކަމަށް ރައީސް ވިދާޅުވިއެވެ.

މީގެއިތުރުން ސާކް ގައުމުތަކުގެ ވެރިންނާއެކު ބޭއްވި ޓެލެކޮންފަރެންސްގައި ވާހަކަދައްކަވަމުން ރައީސް ވިދާޅުވީ ކޮވިޑް-19 ފެތުރޭތީ ރާއްޖޭގެ ފަތުރުވެރިކަން ދަށްވެ، ބޭރުފައިސާގެ އާމްދަނީން 450 މިލިއަން ޑޮލަރު މަދުވެގެންދާނެ ކަމަށެވެ. އަދި މި ވަގުތު ލަފާކުރެވޭ ގޮތުގައި ސަރުކާރުގެ އާމްދަނީގެ 135.9 މިލިއަން ޑޮލަރާ 446.9 މިލިއަން ޑޮލަރުގެ ގެއްލުމެއްވާނެ ކަމަށް ރައީސް ވިދާޅުވި އެވެ.