ޖެންޑަރ މިނިސްޓަރ އައިޝާ އަށް ރުހުންދީފި
16 މާރިޗު 2020 | ހޯމަ 08:38މިނިސްޓަރ އަށް ރުހުން ދިނުމަށް ފެންނަކަމަށް ވޯޓުދެއްވާފައިވަނީ 68 މެމްބަރުން
ޖެންޑަރ މިނިސްޓަރ އައިޝަތު މުހައްމަދު ދީދީ
ޖެންޑަރ މިނިސްޓަަރ އާއިޝަތު މުހައްމަދު ދީދީ (އައިޝާ) އަށް ރައްޔިތުންގެ މަޖިލީހުން ރުހުންދީފި އެވެ.
މިނިސްޓަރ އައިޝާ އަށް ރުހުންދިނުމަށް ނެގުނު ވޯޓުގައި ބައިވެރިވެޑައިގެންވި 68 މެންބަރުންގެ އިއްތިފާގުން ވަނީ މިނިސްޓަރަށް ރުހުންދޭން ފެންނަކަމަށް މަޖިލީހުން ފާސްކޮށްފަ އެވެ.
ޖެންޑަރ މިނިސްޓަރު އައިޝާއަށް މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މަޖިލީހަށް ފޮނުއްވާފައިވަނީ، ކުރިން ޖެންޑަރ މިނިސްޓަރުކަމުގެ މަޤާމުގައި ހުންނެވި ޝިދާތާ ޝަރީފް އިސްތިޢުފާ ދެއްވުމާއި ގުޅިގެންނެވެ.
ޖެންޑާ މިނިސްޓަރު ކަމަށް އައްޔަންކުރެއްވުމުގެ ކުރިން އާއިޝާ ހުންނެވީ އިންޑިއާގައި ހުންނަވާ ދިވެހި ސަފީރުގެ މަގާމުގަ އެވެ. މީގެއިތުރުން ރައީސް މައުމޫނުގެ ސަރުކާރުގައި އައިޝާ ވަނީ ޖެންޑާ މިނިސްޓަރުކަން ކުރައްވާފަ އެވެ.
ޖެންޑަރ މިނިސްޓަރުކަމުން ޝިދާތާ އިސްތިއުފާ ދެއްވާފައިވަނީ، ކުޑަކުދިންނަށް ޖިންސީ އަނިޔާއާއި ޖިންސީ ގޯނާ ކުރާ މައްސަލަތަކެއް ފެންމަތި، އެމިނިސްޓްރީން އެކަމަށް އެކަށީގެންވާ ގޮތެއްގައި ފިޔަވަޅުތަކެއް އަޅާފައިނުވާތީ، ޝިދާތާގެ އިސްތިއުފާއަށް ސޯޝަލް މީޑިއާގައި އެތައްބަޔަކު ގޮވާލަމުންދިޔަ ދަނޑިވަޅުގައި، އެމްޑީޕީގެ ޕާލަމެންޓްރީ ގްރޫޕުން ވެސް ޝިދާތާގެ އިތުބާރު ނެތްކަމަށް ނިންމުމާ ގުޅިގެން ނެވެ. ޝިދާތާ އިސްތިއުފާ ދެއްވާފައިވާއިރު މިއީ ރައީސް ޞާލިހުގެ ސަރުކާރުގައި މިނިސްޓަރަކު އިސްތިއުފާ ދެއްވި ފުރަތަމަ ފަހަރެވެ.
