ޖެންޑަރ މިނިސްޓަރ އައިޝާއަށް ރުހުން ދިނުމުގެ މައްސަލަ މާދަމާގެ ޖަލްސާގައި
މަޖިލީހުގެ ކޮމެޓީން ނިންމާފައިވަނީ ރުހުން ދިނުމަށް
ޖެންޑަރ މިނިސްޓަރ އައިޝަތު މުހައްމަދު ދީދީ އާ ފަތްކޮޅު ހަވާލުކުރުމުގެ ތެރެއިން
ޖެންޑަރ މިނިސްޓަަރު ކަމަށް ދާދި ފަހުން އައްޔަން ކުރެެއްވި އާއިޝަތު މުހައްމަދު ދީދީ (އައިޝާ) އަށް ރުހުންދިނުމުގެ މައްސަލަ ހޯމަ ދުވަހުގެ ޖަލްސާއަށް އެޖެންޑާ ކޮށްފި އެވެ.
ޖެންޑަރ މިނިސްޓަރ އާއިޝާގެ ނަން ދިރަސާކުރުމަށް ރައްޔިތުންގެ މަޖިލީހުގެ ސަރުކާރު މަސްއޫލިއްޔަތު އަދާ ކުރާ މިންވަރު ބަލާ ކޮމިޓީއަށް ފޮނުވާފައިވަނީ މިދިޔަ ފެބްރުއަރީ މަހުގެ 11 ވަނަ ދުވަހު އެވެ.
ސަރުކާރު މަސްއޫލިއްޔަތު އަދާކުރާ މިންވަރުބަލާ ކޮމެޓީން ޖެންޑަރ މިނިސްޓަރު ކަމަށް އާއިޝާއަށް ރުހުން ދިނުމަށް ފާސްކޮށްފައިވަނީ، ކޮމެޓީގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުން ނެވެ. ޖެންޑަރ މިނިސްޓަރު އައިޝާއަށް މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މަޖިލީހަށް ފޮނުއްވާފައިވަނީ، ކުރިން ޖެންޑަރ މިނިސްޓަރުކަމުގެ މަޤާމުގައި ހުންނެވި ޝިދާތާ ޝަރީފް އިސްތިޢުފާ ދެއްވުމާއި ގުޅިގެންނެވެ.
ޖެންޑާ މިނިސްޓަރު ކަމަށް އައްޔަންކުރެއްވުމުގެ ކުރިން އާއިޝާ ހުންނެވީ އިންޑިއާގައި ހުންނަވާ ދިވެހި ސަފީރުގެ މަގާމުގަ އެވެ. މީގެއިތުރުން ރައީސް މައުމޫނުގެ ސަރުކާރުގައި އައިޝާ ވަނީ ޖެންޑާ މިނިސްޓަރުކަން ކުރައްވާފަ އެވެ.
ޖެންޑަރ މިނިސްޓަރުކަމުން ޝިދާތާ އިސްތިއުފާ ދެއްވާފައިވަނީ، ކުޑަކުދިންނަށް ޖިންސީ އަނިޔާއާއި ޖިންސީ ގޯނާ ކުރާ މައްސަލަތަކެއް ފެންމަތި، އެމިނިސްޓްރީން އެކަމަށް އެކަށީގެންވާ ގޮތެއްގައި ފިޔަވަޅުތަކެއް އަޅާފައިނުވާތީ، ޝިދާތާގެ އިސްތިއުފާއަށް ސޯޝަލް މީޑިއާގައި އެތައްބަޔަކު ގޮވާލަމުންދިޔަ ދަނޑިވަޅުގައި، އެމްޑީޕީގެ ޕާލަމެންޓްރީ ގްރޫޕުން ވެސް ޝިދާތާގެ އިތުބާރު ނެތްކަމަށް ނިންމުމާ ގުޅިގެން ނެވެ.
