ރޮނާލްޑޯ އަމިއްލަ ގައުމުގައި ކަރަންޓީނު ވެއްޖެ

ޔުވެންޓަސްގެ ތަރި ކްރިސްޓިއާނޯ ރޮނާލްޑޯގެ އަމިއްލަ ގައުމު ކަމުގައިވާ ޕޯޗުގަލްގައި ކަރަންޓީނުވެފައިވާ ކަމަށް ޔުވެންޓަސްއިން ބުނެފިއެވެ.

ޔުވެންޓަސްގެ ޑިފެންޑަރު ޑެނިއެލް ރުގާނީ ކޮރޯނާވައިރަސް (ކޮވިޑް-19) އަށް ޕޮޒިޓިވް ވުމާއި ގުޅިގެން ޔުވެންޓަސްގެ ކުޅުންތެރިން އިޓަލީގައި ކަރަންޓީނު ކޮށްފައިވާއިރު ރޮނާލްޑޯ ހުރީ އޭނާގެ މަންމަގެ ސިއްހީ ހާލަތު ގޯސްވުމުން ޕޯޗުގަލްގައެވެ.

ޔުވެންޓަސްއިން ބުނީ އިޓާލިއަން ލީގުގައި އިންޓަ މިލާނާއި ދެކޮޅަށް ޔުވެންޓަސް ކުޅުނު މެޗަށްފަހު ރޮނާލްޑޯ ޕްރެކްޓިސް ހުއްޓައިލުމަށްފަހު އޭނާގެ މަންމަގެ ގާތަށް ޕޯޗުގަލްއަށް ގޮސްފައިވާ ކަމަށާއި، އަދި އިޓަލީ ލޮކްޑައުން ކުރުމުން އިތުރު ފަރިތަކުރުންތަކުގައި ބައިވެރިވާން ރޮނާލްޑޯއަށް އެގައުމަށް އެތެރެވެވިފައި ނުވާ ކަމަށެވެ.

ޔުވެންޓަސްއިން އިތުރަށް ބުނީ ރޮނާލްޑޯ ވަނީ ބުރާސްފަތި ދުވަހު ކޮރޯނާވައިރަސް (ކޮވިޑް-19) އަށް ޓެސްޓު ކޮށްފައި ކަމަށާއި، އޭނާގެ ފުރަތަމަ ރިޕޯޓު ދައްކާ ގޮތުން އޭނާ ވައިރަސް އަށް ޕޮޒިޓިވް ނުވާ ކަމަށެވެ. އަދި ދެވަނަ ރިޕޯޓު މިއަދު ހަދާނެ ކަމަށްވެސް ޔުވެންޓަސްއިން ބުނެއެވެ. މީގެ އިތުރުން ޔުވެންޓަސްއިން ބުނީ ރޮނާލްޑޯ ކަރަންޓީނުވާން ނިންމީ އޭނާ އަމިއްލައަށް ކަމަށެވެ.

ކޮރޯނާވައިރަސް (ކޮވިޑް-19) ގެ ސަބަބުން ޔޫރަޕްގެ ބޮޑެތި ގައުމުތަކުގެ ލީގުގެ މެޗުތައް ފަސްކުރަމުން އަންނައިރު ސްޕެނިޝް ލީގާއި އިޓާލިއަން ލީގުގެ މެޗުތައް ނުކުޅުމަށް ވަނީ ނިންމައިފައެވެ. އަދި ފްރެންޗް ލީގާއި ޖަރުމަނު ލީގުގެ އިތުރުން ޕްރިމިއާ ލީގުގެ މެޗުތަކަށް ސަޕޯޓަރުން ނުވެއްދުމަށް އެގައުމު ތަކުގެ ސަރުކާރުން ވަނީ ނިންމައިފައެވެ.

އިޓަލީގައި މިހާތަނަށް ކޮރޯނާވައިރަސް (ކޮވިޑް-19) 15،113 މީހުންނަށް ޖެހިފައިވާއިރު މި ބަލީގައި އެގައުމުން 1،016 މީހުން ވަނީ މަރުވެފައެވެ. އަދި ސްޕެއިންގައި މި ބަލި ޖެހުނު މީހުންގެ އަދަދު 3،059 އަކަށް އަރައިފައިވާއިރު މި ބަލީގައި އެގައުމުން 86 މީހުން ވަނީ މަރުވެފައެވެ.