ސްޕެއިންގެ ވެލެންސިއާ ކޮޅަށް އިލިސިޗް ކާމިޔާބުކުރި ހަތަރު ލަނޑާއިއެކު އިޓަލީގެ އެޓަލާންޓާ ޔުއެފާ ޗެމްޕިއަންސް ލީގުގެ ކުއާޓާ ފައިނަލަށް ދަތުރުކޮށްފިއެވެ.

ވެލެންސިއާގެ ދަނޑުގައި އަންގާރަ ދުވަހުގެރޭ ކުޅުނު މި މެޗު އެޓަލާންޓާއިން ކާމިޔާބުކުރީ 4-3 ގެ ނަތީޖާއަކުންނެވެ. މި ދެޓީމު ބައްދަލުކުރި ފުރަތަމަ ލެގުގެ މެޗު އެޓަލާންޓާއިން ކާމިޔާބުކުރީ 4-1 ގެ ނަތީޖާއަކުންނެވެ.

އަންގާރަ ދުވަހުގެރޭ ކުޅުނު މެޗުގައި އެޓަލާންޓާގެ ހަތަރު ލަނޑުވެސް ޖަހައިދިނީ ސްލޮވީނިއާގެ ފޯވާޑް ޖޯސިޕް އިލިސިޗް އެވެ. މިއީ ސްލޮވީނިއާ ކުޅުންތެރިޔަކު މި މުބާރާތުގެ ތާރީހުގައި ހެޓްރިކް ހެދި ފުރަތަމަ ފަހަރެވެ. އޭނާ ޖެހި ހަތަރު ލަނޑުގެ ތެރެއިން ދެ ލަނޑަކީ ޕެނަލްޓީން އޭނާ ކާމިޔާބުކުރި ދެ ލަނޑެވެ.

އަންގާރަ ދުވަހުގެރޭ ކުޅުނު މެޗުގައި ވެލެންސިއާ އިން ޖެހި ތިން ލަނޑުގެ ތެރެއިން ދެ ލަނޑު ކާމިޔާބުކުރީ ކެވިން ގެމީރޯ އެވެ. އަނެއް ލަނޑު އެޓީމަށް ކާމިޔާބުކޮށްދިނީ ފެރާން ޓޮރޭޒް އެވެ.

މެޗަށްފަހު ވާހަކަދައްކަމުން އެޓަލާންޓާގެ ފޯވާޑް އިލިސިޗް ބުނީ އެޓަލާންޓާ އަކީ މިހާރު ސަޕްރައިޒެއް ނޫން ކަމަށާއި، އެޓީމުން އަންނަނީ ބޮޑެތި ކަންކަން ކުރަމުން ކަމަށެވެ. އަދި އެޓަލާންޓާ އަބަދުވެސް ދާނީ ކުރިޔަށް ކަމަށާއި، އެޓަލާންޓާއިން ޗެމްޕިއަންސް ލީގުގެ މިހިސާބަށް އައީ އެޓީމަށް ކުއާޓާ ފައިނަލް ހައްގުވުމުން ކަމަށްވެސް އިލިސިޗް ބުންޏެވެ.

އެޓަލާންޓާއިން ޗެމްޕިއަންސް ލީގުގެ ޖާގަ ހޯދީ ނިމިދިޔަ އަހަރުގެ އިޓާލިއަން ލީގުގެ ތިންވަނަ ހޯދައިގެންނެވެ.