އޭއެފްސީ ކަޕަށް ޓީމު އޮތީ ތައްޔާރުވެފައި: ޝާޒްލީ

އޭއެފްސީ ކަޕްގައި ބަންގްލަދޭޝްގެ ބަޝުންދަރާ ކިންގްސް އާއި ދެކޮޅަށް ބުދަ ދުވަހު ޓީސީ ސްޕޯޓްސް ކްލަބުން ބަންގާޅުގައި ނުކުންނައިރު، ޓީމު އޮތީ މުބާރާތަށް ވަރަށް ރަނގަޅަށް ތައްޔާރުވެފައި ކަމަށް އެޓީމުގެ ކޯޗު މުހައްމަދު ޝާޒްލީ (ޝާޒް) ބުނެފިއެވެ.

ޝާޒްލީ ބުނީ ޓީސީ އިން އޭއެފްސީ ކަޕަށް ޑިސެމްބަރު މަހުން ފަށައިގެން ތައްޔާރު ވަމުން އަންނަ ކަމަށާއި އެގޮތުން ޓީސީން ވަނީ ޓީމުގެ ސްކޮޑް ވަރުގަދަ ކޮށްފައިކަމަށެވެ. އަދި ޓީމުގެ ސްކޮޑް ރަނގަޅުކޮށް ޓީސީން ވަނީ ކޮމްޕެޓިޓިވް ރަނގަޅު މެޗުތަކެއް ކުޅެފައި ކަމަށާއި އަދި ދިރާގު ދިވެހި ޕްރިމިއާ ލީގު ނިންމާލުމަށްފަހު ޓީމު ވަނީ ރަނގަޅު ޓްރެއިނިންގ ކޭމްޕެއް ގަތަރުގައި ކޮށްފައި ކަމަށެވެ. ޝާޒްލީ ބުނީ ޓީސީއިން ގަތަރުގައި ކުރި ޓްރެއިނިންގ ކޭމްޕަކީ ސީދާ އޭއެފްސީ ކަޕްއަށް ތައްޔާރުވުމަށް ކުރި ޓްރެއިނިންގ ކޭމްޕެއް ކަމަށް ބުނެފައެވެ.

ބަޝުންދަރާއާ ދެކޮޅަށް ޓީސީން ނުކުންނައިރު ބަޝުންދަރާއަކީ ވަރުގަދަ ޓީމެއް ކަން އިނގޭ ކަމަށެވެ. ނަމަވެސް ޓީސީން ނުކުންނާނީ ރަށުން ބޭރުގައި މޮޅެއް ހޯދުމުގެ ނިޔަތުގައި ކަމަށް ބުނަމުން ޝާޒްލީ ބުނީ މި ގްރޫޕުގައި މި އޮތް ހަތަރު ޓީމަކީ އެއް ލެވެލްއެއްގެ ހަތަރު ޓީމެއް ކަމަށާއި ނަމަވެސް ބަޝުންދަރައިގައި ތިބި ބިދޭސީ ކުޅުންތެރިންގެ ތަފާތު ފެންނާނެ ކަމަށެވެ.

ޓީސީގައި ތަޖުރިބާކާރު ކުޅުންތެރިންތަކެއް މިވަގުތު ތިބުން އެއީ މި މެޗަށް ނުކުންނައިރު ލިބޭނެ ފައިދާއެއް ކަމަށާއި ހަމައެހެންމެ ބަންގާޅު ޓީމުތަކާއި ދެކޮޅަށް ކުޅެފައި ހުރި ކުޅުންތެރިން ޓީމުގައި ތިބުމުން މި މެޗުގައި އެ ކުޅުންތެރިންގެ ފައިދާ ޓީސީން ވަރަށް ރަނގަޅަށް ނަގާނެ ކަމަށް ޝާޒްލީ ބުންޏެވެ.

އޭއެފްސީ ކަޕްގެ ގްރޫޕް ސްޓޭޖުގެ މެޗުތައް ފަށާއިރު، މިފަހަރުގެ ގްރޫޕް ސްޓޭޖުގައި ރާއްޖޭގެ ދެ ޓީމު ވާދަކުރާނެ އެވެ. މިއީ 2016 ވަނަ އަހަރު އޭއެފްސީ ކަޕްގެ ފޯމެޓަށް ބަދަލުކޮށް، ދެކުނު އޭޝިއާ ޓީމުތަށް އެއް ގްރޫޕެއްގައި ވާދަކުރަން ފެށި ފަހުން ރާއްޖޭގެ ދެ ޓީމެއް ގްރޫޕް ސްޓޭޖުގައި ކުޅޭނެ ފުރަތަމަ ފަހަރެވެ.

އޭއެފްސީ ކަޕްގެ ގްރޫޕް އީ ގައި ހިމެނެނީ ރާއްޖޭގެ ޓީސީ ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަނުގެ އިތުރުން އިންޑިއަން އައި ލީގުގެ ޗެމްޕިއަން ޗެންނާއީ ސިޓީ އާއި ބަންގްލަދޭޝްގެ ބަޝުންދަރާ ކިންގްސް އެވެ.

އޭއެފްސީ ކަޕާ ޓީސީން ކުރިމަތިލާއިރު، އެޓީމުން ވަނީ މި މުބާރާތަށް ޓީމު ވަރުގަދަކޮށްފަ އެވެ. އެ ގޮތުން ޓީސީން ވަނީ ކްލަބު ގްރީން ސްޓްރީޓްސް އިން އަލީ އަޝްފާގު (ދަގަނޑޭ) އާއި ފޯކައިދޫ ފުޓްބޯލް ކްލަބުން އަލީ ޝާމިސް (ތޮއްޕޭ) އާއި ޕާކިސްތާންގެ ގޯލްކީޕަރު ހަނީފް ސާގިބް އަދި މިސްރުގެ ދެ ކުޅުންތެރިން ކަމަށްވާ ޚަލީލް ޖަމާލް އަދި މަހުމޫދު ސައީދު ގެނެސްފަ އެވެ. މީގެ އިތުރުން މާޒިޔާ އިން އަބްދުﷲ ހަނީފް (ބެންޖޯ) ހޯދިއިރު، ސެއިންޓް ވިންސެންޓްގެ ފޯވާޑެއް ކަމަށްވާ ކެސިއަސް މެލްކަމް ސްޓެވާޓް ވެސް ވަނީ ގެނެސްފަ އެވެ.

ގްރޫޕް ސްޓޭޖުގައި ބަޝުންދަރާ ކިންގްސްއާ ދެކޮޅަށް ޓީސީ ނުކުންނާނީ އަންނަ ބުދަ ދުވަހު ރާއްޖެ ގަޑިން 14:30 ގައެވެ. މި މެޗު ކުޅޭނީ ޑާކާގެ ބަންގަބަންދު ނެޝަނަލް ސްޓޭޑިއަމް ގައެވެ.