އިނގިރޭސި ޕްރިމިއާ ލީގުގައި މެންޗެސްޓާ ސިޓީ ބަލިކޮށް މެންޗެސްޓާ ޔުނައިޓެޑް ގަދަ ހަތަރެއްގެ އުންމީދު އާކޮށްފިއެވެ.

ޔުނައިޓެޑްގެ ދަނޑުގައި އާދީއްތަ ދުވަހުގެރޭ ކުޅުނު މި މެޗު އެޓީމުން ކާމިޔާބުކުރީ 2-0 ގެ ނަތީޖާ އަކުންނެވެ.

މި މޮޅާއެކު ތާވަލުގެ ފަސްވަނައިގައި ޔުނައިޓެޑް އޮތީ ކުޅުނު 29 މެޗުން ލިބުނު 45 ޕޮއިންޓާއެކުގައެވެ. ތާވަލުގެ ހަތަރުވަނައިގައި އޮތް ޗެލްސީއަށް 29 މެޗުން ލިބިފައިވަނީ 48 ޕޮއިންޓެވެ. އާދީއްތަ ދުވަހުގެރޭ ކުޅުނު މެޗުން ސިޓީ ބަލިވި ނަމަވެސް އެޓީމުން އޮތީ ލީގު ތާވަލުގެ ދެވަނައިގައި ކުޅުނު 28 މެޗުން ލިބުނު 57 ޕޮއިންޓާއެކުގައެވެ.

ޔުނައިޓެޑުގެ ދަނޑުގައި ކުޅުނު މި މެޗު ފަށައިގެން ޔުނައިޓެޑުން މޮޅު އެޓޭކިންގ ގޭމެއް ކުޅުނުއިރު މެޗުގެ 30 ވަނަ މިނެޓުގައި ޔުނައިޓެޑުން ވަނީ ލަނޑު ޖަހާ ލީޑު ނަގައިފައެވެ. މި ލަނޑު ބްރޫނޯ ފެނާންޑޭޒްގެ އެހީތެރިކަމާއިއެކު ކާމިޔާބުކޮށްދިނީ އެންތަނީ މާޝިއަލް އެވެ. މި ލަނޑަށްފަހު ވެސް ޔުނައިޓެޑަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ. އެގޮތުން ޔުނައިޓެޑްގެ މަޓިޗް އަށް ހުސްކޮށް ލިބުނު ފުރުސަތު އޭނާ ވަނީ ނަގައިލާފައެވެ.

ދެވަނަ ހާފު ފަށައިގެން ސިޓީން އެޓީމުގެ ކުޅުން ރަނގަޅުކޮށް ޔުނައިޓެޑްގެ ގޯލަށް ނުރައްކާ ކޮށްފައިވެއެވެ. މެޗުގެ 56 ވަނަ މިނެޓުގައި ސިޓީގެ ޕިލް ފޯޑެން ފޮނުވައިލި ބޯޅަ ޔުނައިޓެޑްގެ ގޯލްކީޕަރު ޑޭވިޑް ޑެހެއާ ވަނީ ހުށިޔާރު ކަމާއިއެކު ދިފާއުކޮށްފައެވެ. މީގެ އިތުރުން ސިޓީގެ ނިކޮލަސް އަށްވެސް ވަނީ މި ހާފުގައި ރަނުގެ ފުރުސަތެއްލިބި ބޭކާރުވެފައެވެ. ޔުނައިޓެޑުގެ ދެވަނަ ލަނޑު މެޗުގެ އެންމެ ފަހު މިނެޓުގައި އެޓީމަށް ކާމިޔާބުކޮށްދިނީ ސްކޮޓް މޮކްޓޮމިނޭ އެވެ.

މެޗަށްފަހު ވާހަކަދައްކަމުން ޔުނައިޓެޑްގެ ކޯޗު އޮލަގުނަ ސޯލްޝެޔާ ބުނީ މެޗުގައި ޔުނައިޓެޑްގެ ކުޅުންތެރިން ދެއްކީ ތައުރީފު ހައްގު ކުޅުމެއް ކަމަށާއި ސިޓީއަކީ ވަރުގަދަ ޓީމެއް ކަމަށާއި އެހެން ކަމުން މި މެޗަށް ޔުނައިޓެޑުން ވަރަށް ރަނގަޅަށް ތައްޔާރުވި ކަމަށެވެ. އަދި ޔުނައިޓެޑުން ދުވަހެއް ދުވަހަކަށް އަންނަނީ ކުޅުން ރަނގަޅު ކުރަމުން ކަމަށެވެ.

ސިޓީގެ ކޯޗު ޕެޕް ގާޑިއޯލާ ބުނީ މެޗުން ބަލިވީ ހެދުނު ގޯސްތަކުގެ ސަބަބުން ކަމަށާއި މެޗުގައި ކުޅުންތެރިންގެ ފަރާތުން ރަނގަޅު ކުޅުމެއް ފެނިގެންދިޔަ ނަމަވެސް ނަސީބު އެހީ ނުވި ކަމަށެވެ.