ރިސޯޓު ލީގު 2020 ގެ ދ. ޒޯނުގެ ސެމީ ފައިނަލްގެ ފަހު ދެ ޖާގަ ނިޔާމަ ޕްރައިވެޓް އައިލެންޑްސް މޯލްޑިވްސް އާއި އަންގްސާނާ ވެލާވަރު ހޯދައިފި އެވެ.
ދ. ޒޯނުގެ ކުޅުން ކަނޑިންމައިގައި ކުރިއަށްދާއިރު، ސެމީއަށް އެންމެ ފަހުގެ ޗެމްޕިއަން ނިޔާމަ ދަތުރުކުރީ ބުދަ ދުވަހު ހަވީރު ކުޅުނު ޕްލޭއޮފް ފުރަތަމަ މެޗުގައި ސަން އަކުއާ ވިލު ރީފް އަތުން ފަސޭހަކަމާއެކު 5-0 އިން މޮޅުވެގެންނެވެ.
މި މެޗުގައި ނިޔާމަގެ ލަނޑުތައް ޖަހައިދިނީ އަލީ ފަހުމީ އާއި، އާލިމް އަލީ އާއި، ސައުދުﷲ ހުސެއިނާއި، އިސްމާއިލް ނިހާނުގެ އިތުރުން އަރުޝަމް މުހައްމަދެވެ.
ސެމީގެ ފަހު ޖާގަ ވެލާވަރު ހޯދީ ބުދަ ދުވަހު ހަވީރު ކުޅުނު ޕްލޭއޮފް ދެވަނަ މެޗުގައި ސަން އަކުއާ އިރު ވެލި އަތުން 2-0 އިން މޮޅުވެގެންނެވެ. މި މެޗުގައި ވެލާވަރުން ކާމިޔާބުކުރި ލަނޑުތައް ޖަހައިދިނީ ހަސަން ރިލުވާން މޫސާ އާއި ޝާރިފް އަލީ ނަސީރެވެ.
މުބާރާތުގެ ސެމީ ފައިނަލް ފުރަތަމަ މެޗުގައި ބައްދަލުކުރާނީ ސެއިންޓް ރީޖަސް އާއި ނިޔާމަ އެވެ. އަދި ސެމީގެ ދެވަނަ މެޗުގައި ބައްދަލުކުރާނީ ކަނޑިންމަ މޯލްޑިވްސް އާއި ވެލާވަރެވެ. ސެމީގެ މެޗުތައް ކުޅުމަށް ހަމަޖެހިފައިވަނީ އަންނަ ހުކުރު ދުވަހު އެވެ. އަދި މުބާރާތުގެ ފައިނަލް މެޗު ކުޅޭނީ އަންނަ އާދީއްތަ ދުވަހު އެވެ.
ރިސޯޓު ލީގުގެ ފަރާތުން ކޮންމެ އަހަރަކު ވެސް ކުރިޔަށްގެންދާ މި މުބާރާތް މި އަހަރު ވެސް ކުރިޔަށްދަނީ ފަސް ޒޯނަކަށް ބަހާލައިގެން ނެވެ. އެއީ ދ. ޒޯނުގެ އިތުރުން ނޯތު މާލެ ޒޯނާއި، ބ. ޒޯނާއި، ސައުތު އަރި ޒޯން އަދި ސައުތު މާލެ ޒޯނެވެ.
އެއް މަސް ދުވަހަށް ދިގު ދެމިގެންދާ މި މުބާރާތުގައި މި އަހަރު 42 ރިސޯޓް ވާދަކުރާއިރު، 79 މެޗު ކުޅެވިގެންދާނެއެވެ.
މި މުބާރާތުގެ މި އަހަރު މީޑިއާ ޕާޓްނަރަކީ ރާއްޖެ ޓީވީ އެވެ. މުބާރާތުގެ ފަސް ޒޯންގެ ފައިނަލް މެޗު ރާއްޖެޓީވީން ވަގުތުން ގެނެސްދިނުމަށް ވަނީ ހަމަޖެހިފައެވެ.
