އިސްލާމިކް ޔުނިވާސިޓީގެ ބަދަލުގައި ފެކަލްޓީއެއް ހެދުމުގެ ހިޔާލު ފާޅުކުރުމުން ބޯ ބުރިކުރަން ގޮވި: އިންތި
ތައުލީމު ދޭ ތަނެއްގެ ފެންވަރު ރަނގަޅުކުރުމުގެ ނިޔަތުގައި ޚިޔާލެއް ފާޅުކުރުމުން ކަރު ބުރިކުރަން އަމުރުކުރި ކަމަށް އިންތި ވިދާޅުވި
މާފަންނު އުތުރު ދާއިރާގެ މެންބަރު އިމްތިޔާޒު ފަހްމީ
އިސްލާމިކް ޔުނިވަރސިޓީގެ ބަދަލުގައި ގައުމީ ޔުނިވަރސިޓީގައި އިސްލާމިކް ފެކަލްޓީއެއް ގާއިމު ކުރުމުގެ ޚިޔާލު ރައްޔިތުންގެ މަޖިލީހުގެ ޖަލްސާއެއްގައި ފާޅު ކުރުމުން ބޯ ބުރި ކުރަން ބައެއް މީހުން ގޮވާލި ކަމަށް ވިދާޅުވެ މާފަންނު އުތުރު ދާއިރާގެ މެންބަރު އިމްތިޔާޒު ފަހްމީ (އިންތި) ކަންބޮޑުވުން ފާޅު ކުރައްވައިފި އެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ދިވެހިރާއްޖޭގެ މަތީ ތައުލީމުގެ ބިލަށް ވާހަކަދައްކަވަމުން އިންތި ވިދާޅުވީ ތައުލީމު ދޭ ތަނެއްގެ ފެންވަރު ރަނގަޅުކުރުމުގެ ނިޔަތުގައި ޚިޔާލެއް ފާޅުކުރުމުން ކަރު ބުރިކުރަން އަމުރުކުރި ކަމަށެވެ. އިސްލާމްދީން މިގައުމުން ނައްތާލަނީ ކަމަށް ވިދާޅުވެ ބައެއް ފަރާތްތަކުން ނޫސްތަކުގަޔާއި އެނޫންތަންތާންގައި އެގޮތަށް ގޮވާލާފައިވާކަމަށް ވިދާޅުވެ އިންތިވަނީ އެކަމުގެ ކަންބޮޑުވުން ފާޅުކުރައްވާފަ އެވެ.
އިންތި ވަނީ އިސްލާމިކް ޔުނިވަރސިޓީއަށް ބަދަލެއް ގެނައުމުން އިސްލާމް ދީން މި ގައުމުން ފޮހެވިގެންދާނެތޯ ސުވާލުކުރައްވާފަ އެވެ. އިންތި ވިދާޅުވީ އިސްލާމިކް ޔުނިވަރސިޓީގެ ބަދަލުގައި ފެކަލްޓީއެއް ހެދުމުގެ ވިސްނުން ފާޅު ކުރެއްވީ އިސްލާމް ދީން އޮތުމާ ދެކޮޅު ހެއްދެވުމުގެ ގޮތުން ނޫން ކަމަށާއި ރާއްޖެއަކީ އިސްލާމީ ގައުމެއް ކަމަށެވެ.
މީގެއިތުރުން އިންތި ވީދާޅުވީ ދައުލަތުގެ ޚަރަދުގައި ކުރެވޭ ކަމަކަށްވާނަމަ ދެ ޔުނިވަރސިޓީ ހިންގުމަކީ މައްސަލައެއް ނޫން ކަމަށެވެ. އަދި އިސްލާމިކް ޔުނިވަރސިޓީއެއް އޮތުމަކީ މަރުހަބާ ކިޔާ ކަމެއް ކަމަށާއި އިސްލާމިކް ޔުނިވަރސިޓީއަކީ ރައްޔިތުންގެ މަޖިލީހުގެ އުފެއްދުމެއް ކަަމަށެވެ.
ޤާނޫނުތަކުން ހާސިލުކުރަން ބޭނުންވަނީ ކިޔަވައިދޭ ތަންތަނުގެ ފެންވަރު މަތިކުރުން ކަމަށް ވިދާޅުވެ އިންތި ވިދާޅުވީ މަގްސަދަކީ ތަންތަނުގެ ކޮލިޓީ ހިފެހެއްޓުން ކަަމަށެވެ.
