ރިސޯޓު ލީގު: ސެއިންޓް ރީޖަސް އާއި ކަނޑިންމައަށް މޮޅެއް

ރިސޯޓު ލީގު 2020 ގެ ދ. ޒޯނުގައި ހޯމަ ދުވަހު ކުޅުނު މެޗުތަކުން ސެއިންޓް ރީޖަސް އާއި ކަނޑިންމަ މޯލްޑިވްސް މޮޅުވެއްޖެ އެވެ.

ދ، ޒޯނުގެ ކުޅުން ކަނޑިންމައިގައި ކުރިއަށްދާއިރު، ހޯމަ ދުވަހު ކުޅުނު ފުރަތަމަ މެޗުން ސެއިންޓް ރީޖަސް ވަނީ ފަސޭހަކަމާއެކު 8-0 ގެ ނަތީޖާއަކުން އިރު ވެލި އަތުން މޮޅުވެފައެވެ.

މި މެޗުގައި ސެއިންޓް ރީޖަސްގެ މުހައްމަދު އަލީ އާއި ނަސްރުﷲ ޖަމީލް، މިއިން ކޮންމެ ކުޅުންތެރިއަކު ދެ ލަނޑު ޖެހިއިރު، އެޓީމުގެ އަނެއް ލަނޑުތައް ޖަހައިދިނީ އިބްރާހީމް އިޒުދިހާރާއި އަހުމަދު ޝާފިއުގެ އިތުރުން ޕޮލް ނަރަންޖޯ އެވެ. ސެއިންޓް ރީޖަސްގެ އަނެއް ލަނޑަކީ އިރު ވެލީގެ އަބްދުﷲ ސަލާމް ނާޖީގެ އަތުން ބައިކޮޅަށް ވަން ލަނޑެކެވެ.

ހޯމަ ދުވަހު ކުޅުނު ދެވަނަ މެޗުގައި އެންމެ ފަހުގެ ޗެމްޕިއަން ނިޔާމަ އަތުން ކަނޑިންމަ މޮޅުވީ 3-1 އިންނެވެ. މި މެޗުގައި ކަނޑިންމަގެ ލަނޑުތައް ޖަހައިދިނީ މުހައްމަދު ޝާހު އާއި، އާފާގު ހަމީދު އަދި އަބްދުﷲ ޔައުގޫބެވެ. މެޗުގައި ނިޔާމައިން ޖެހި ހަމައެކަނި ލަނޑު އެޓީމަށް ކާމިޔާބުކޮށްދިނީ އާލިމް އަލީ އެވެ.

މިއަހަރުގެ ދ. ޒޯނުގައި 6 ރިސޯޓަކުން ވާދަކުރެއެވެ. އެއީ ސަން އަކުއާ ވިލު ރީފާއި، އިރު ވެއްޔާއި، ސެއިންޓް ރީޖަސް އާއި، އަންގްސާނާ ވެލާވަރާއި، ނިޔާމަ ޕްރިވެޓް އައިލެންޑް މޯލްޑިވްސް އަދި ކަނޑިންމަ މޯލްޑިވްސް އެވެ.

ދ. ޒޯނުގެ ފައިނަލް މެޗު އޮންނާނީ މި މަހުގެ 8 ވަނަ ދުވަހު އެވެ.

ރިސޯޓު ލީގުގެ ފަރާތުން ކޮންމެ އަހަރަކު ވެސް ކުރިޔަށްގެންދާ މި މުބާރާތް މި އަހަރު ވެސް ކުރިޔަށްދާނީ ފަސް ޒޯނަކަށް ބަހާލައިގެން ނެވެ. އެއީ ދ. ޒޯނުގެ އިތުރުން މިއަހަރު ކުޅުން ކުރިއަށްދާނީ ނޯތު މާލެ ޒޯނާއި، ބ. ޒޯނާއި، ސައުތު އަރި ޒޯން އަދި ސައުތު މާލެ ޒޯނެވެ.

އެއް މަސް ދުވަހަށް ދިގު ދެމިގެންދާ މި މުބާރާތުގައި މި އަހަރު 42 ރިސޯޓް ވާދަކުރާއިރު، 79 މެޗު ކުޅެވިގެންދާނެއެވެ.

މި މުބާރާތުގެ މި އަހަރު މީޑިއާ ޕާޓްނަރަކީ ރާއްޖެ ޓީވީ އެވެ.