ކުރީގެ ރައީސް އަބްދުﷲ ޔާމީން ސަރުކާރުގައި ބެޔަސް ނުބެއަސް މަސްވެރިންނަށް ދިނުމަށް ކަނޑައެޅި 10،000 ރުފިޔާ ލިބިފައިވަނީ އެންމެ ދޯންޏަކަށް ކަމަށް ފިޝަރީޒް މިނިސްޓަރ ޒަހާ ވަހީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި ތިނަދޫ އުތުރު ދާއިރާގެ މެމްބަރ ޢަބްދުލްމުޣުނީ ވަނީ ބެޔަސް ނުބެއަސް ސްކީމްގެ ދަށުން ފައިސާ ލިބުނީ ކިތައް މަސްވެރިންނަށްތޯ މިނިސްޓަރ އަރިހުން ސުވާލުކުރައްވާފަ އެވެ. އެސުވާލަށް ޖަވާބުދެއްވަމުން މިނިސްޓަރ ވިދާޅުވީ އެސްކީމްގެ ދަށުން ފައިސާ ލިބިފައިވަނީ އެންމެ ދޯންޏަކަށް ކަމަށެވެ.

މިނިސްޓަރ އެގޮތަށް ޖަވާބު ދެއްވުމުން ރިޔާސަތުގައި އިންނެވި މަޖިލީހުގެ ރައީސް ،ރައީސް މުހައްމަދު ނަޝީދު ވަނީ އެއީ ކޮންދޯންޏެއްތޯ އެނގިވަޑައިގަތުމުގެ ޝައުގުވެރިކަން ފާޅުކުރައްވާފަ އެވެ. އަދި ހޯރަފުށި ދާއިރާގެ މެމްބަރ އަހުމަދު ސަލީމް ވަނީ ސުވާލުކުރެއްވުމުގެ ފުރުސަތު ހޯއްދަވާ އެއީ ކޮން ދޯންޏެއްތޯ އާއި އެކަން ބެލުމަށް ގިނަ ބަޔަކު ޝައުގުވެރިވާކަމަށް ވިދާޅުވެފަ އެވެ.

ބެޔަސް ނުބެޔަސް އަކީ، މަސްވެރިކަން ދަށް މޫސުމުގައި ނުވަތަ މޫސުން ގޯސްވެގެން މަހަށް ނުދެވޭ ދުވަސްވަރު، މަސްވެރިންނަށް އާމްދަނީގެ ގޮތުގައި ފައިސާ ލިބޭނެ ގޮތަށް އެކަށައަޅާފައިވާ ސްކީމެކެވެ. 2013 ވަނަ އަހަރުގެ ރިޔާސީ އިންތިހާބަށް ރައީސް ޔާމީން ނެރުއްވި މެނިފެސްޓޯގައި މިކަން ހިމެނެއެވެ. މިވައުދު އެކަށީގެންވާ މިންވަރެއްގައި ފުއްދިފައިނުވާތީ އެކަމަށް ގިނަ ބައެއްގެ ފާޑުކިޔުން މީގެކުރިން ވަނީ އަމާޒުވެފަ އެވެ.