ދިރާގުން ސެމްސަންގްގެ އެންމެ ފަހުގެ ފޯން ތަޢާރަފްކޮށްފި
މި ތިން ފޯންވެސް ދިރާގުގެ ވެބްސައިޓު މެދުވެރިކޮށް ޕްރީއޯޑާ ކުރެވޭނެ
ދިރާގުން ސެމްސަންގްގެ އެންމެ ފަހުގެ ފޯން ތަޢާރަފްކުރުން
ރާއްޖޭގައި އެންމެ ފުރަތަމަ މުވާސަލާތީ ޚިދުމަތްދޭންފެށި ކުންފުނި ދިރާގުން ސެމްސަންގް ގެލެކްސީ އެސް 20، އެސް 20 ޕަލްސް އަދި އެސް 20 އަލްޓްރާ ތަޢާރަފްކޮށްފިއެވެ.
އާދިއްތަ ދުވަހުގެރޭ ދިރާގު ހެޑް އޮފީހުގައި ބޭއްވި ހަފްލާއެއްގައި މި ފޯން ތަޢާރަފްކޮށްދެއްވީ ސެމްސަންގް ސްރީލަންކާ ބްރާންޗްގެ މެނޭޖިން ޑިރެކްޓަރ މިސްޓަރ ކެވިން ޔޫ އާއި ޗީފް މާކެޓިން އޮފިސަރ މިސްޓަރ މަހުމޫދު ދައްސަރު އަދި ދިރާގުގެ ބްރޭންޑް އެމްބެސެޑަރ ހަސަން ސާއިދު އެވެ.
މި ފޯން އާދިއްތަ ދުވަހުގެ ރެއިން ފެށިގެން ޕްރީ އޯޑަރ ކުރެވޭނެ ކަމަށް ދިރާގުން މައުލޫމާތު ދެއެވެ. އިންސްޓޯލްމަންޓަށް ފައިސާ ދައްކާނަމަ މަހަކު ދައްކަން ޖެހޭނީ 1009 ރުފިޔާއެވެ.
ސެމްސަންގް އެސް 20 ޕްރީއޯޑަރކުރާ ފަރާތްތަކަށް ފްރީ ބޯނަސް ޑޭޓާގެ ގޮތުގައި ހަ މަސް ވަންދެން ކޮންމެ މަހަކު 5 ޖީބީ ޑޭޓާ ހިލޭ ލިބޭނެއެވެ.
އެސް 20 ޕްލަސް އަދި އެސް 20 އަލްޓްރާ ޕްރީއޯޑާކުރާ ކޮންމެ ކަސްޓަމަރަކަށް ވެސް ފޯނާއެކު ސެމްސަންގް ގެލެކްސީ ބަޑްސް ޕްލަސްއެއް ލިބެއެވެ. މީގެ އިތުރުން ހަ މަސް ދުވަސް ވަންދެން ކޮންމެ މަހަކު 10 ޖީބީގެ ޑޭޓާ ހިލޭ ލިބޭނެ އެވެ.
ދިރާގުން ތަޢާރަފް ކުރި މި ތިން ފޯނަކީ ވެސް ދިރާގުގެ އީސިމް ސަޕޯޓުކުރާ ތިން ފޯނެވެ.
މި ތިން ފޯންވެސް ދިރާގުގެ ވެބްސައިޓު މެދުވެރިކޮށް ޕްރީއޯޑާ ކުރެވޭނެ ކަމަށް ދިރާގުން ބުންޏެވެ.
މި ތިން ފޯނުގެ ފީޗާސް ތަކުގައި އެންމެ ބޮޑު ތަފާތެއް ވަނީ ކެމެރާގައެވެ. ގެލެކްސީ އެސް20 އާއި އެސް 20 ޕްލަސްގައި 12 މެގަޕިކްސެލްގެ ވައިޑް އޭންގަލް ކެމެރާއެއް ހުރެއެވެ.
އެސް 20 އަލްޓްރާގެ ވައިޑް އޭންގަލް ކެމެރާގައި ހުންނަނީ 108 މެގަޕިކްސެލްއެވެ. އެސް 20 އާއި އެސް 20 ޕްލަސްގެ ސެލްފީ ކެމެރާގައި ހުންނަނީ 10 މެގަޕިކްސެލްއެވެ.
އެސް20 އަލްޓްރާގެ ސެލްފީ ކެމެރާގައި ހުންނަނީ 40 މެގަޕިކްސެލް އެވެ.
